256 മില്യൺ ഡോളർ കൈക്കൂലി കേസിൽ വ്യവസായി ഗൗതം അദാനിക്ക് അമേരിക്കൻ കോടതി സമൻസ് കൈമാറാൻ കേന്ദ്ര സർക്കാർ മനഃപൂർവം കാലതാമസം വരുത്തുകയാണെന്ന് ആം ആദ്മി പാർട്ടി (എഎപി) ഡൽഹി യൂണിറ്റ് മേധാവി സൗരഭ് ഭരദ്വാജ്. ബുധനാഴ്ച നടത്തിയ പത്രസമ്മേളനത്തിലാണ് ഭരദ്വാജ് നരേന്ദ്ര മോദി സർക്കാരിനെതിരെ രൂക്ഷമായ വിമർശനം ഉന്നയിച്ചത്.

2024 നവംബറിൽ തന്നെ അദാനിക്കും അദ്ദേഹത്തിന്റെ അനന്തരവനും അമേരിക്കൻ കോടതി സമൻസ് അയച്ചിരുന്നുവെന്നും, എന്നാൽ ഒരു വർഷം കഴിഞ്ഞിട്ടും കേന്ദ്രം ഈ സമൻസ് അദാനിക്ക് കൈമാറിയിട്ടില്ലെന്നുമാണ് മുൻ ഡൽഹി മന്ത്രി കൂടിയായ സൗരഭ് ഭരദ്വാജ് ആരോപിക്കുന്നത്. “ഇന്ത്യയിലെ സർക്കാർ ഉദ്യോഗസ്ഥർക്ക് കൈക്കൂലി നൽകുന്നതിനാണ് ഈ പദ്ധതി ആവിഷ്കരിച്ചത്. അമേരിക്കൻ നിക്ഷേപകരിൽ നിന്ന് നിക്ഷേപം സ്വീകരിച്ച് അഴിമതിയിൽ ഏർപ്പെടുന്നത് ഗുരുതരമായ ക്രിമിനൽ കുറ്റമാണ്,” ഭരദ്വാജ് ചൂണ്ടിക്കാട്ടി.

“മോദി സർക്കാർ അദാനിയെ കണ്ടെത്താൻ കഴിയുന്നില്ലെന്ന് പറയുന്നു,” എന്ന് ആരോപിച്ചുകൊണ്ട് ഭരദ്വാജ്, സർക്കാർ അദാനിയെ സംരക്ഷിക്കാൻ ശ്രമിക്കുകയാണെന്നും, ഇത് ബിസിനസ് പ്രമുഖരെ പിന്തുണയ്ക്കുന്ന കേന്ദ്രസർക്കാരിന്റെ സ്ഥിരം സമീപനം പ്രതിഫലിപ്പിക്കുന്നതായും ആരോപിച്ചു.