ബിജെപിയുടെ വളർച്ച കണക്ക്കൂട്ടലിന് അപ്പുറമെന്ന് സിപിഐ. പാർട്ടി കോൺഗ്രസിൽ ചർച്ച ചെയ്യാൻ പോകുന്ന കരട് രാഷ്ട്രീയ പ്രമേയത്തിലാണ് സിപിഐയുടെ പരാമർശം. ബിജെപിക്കെതിരെ വേണ്ടത് വിശാല ഇടതുപക്ഷ ഐക്യമാണെന്നും ഐക്യം തിരഞ്ഞെടുപ്പ് ഗണിതമാക്കരുതെന്നും പ്രമേയത്തിൽ പറയുന്നു.

ബിജെപിക്കെതിരെയുള്ള ഐക്യം തന്ത്രപരമായ അനിവാര്യതയെന്നും പ്രമേയത്തിൽ സിപിഐ ചൂണ്ടിക്കാട്ടുന്നു. അവസരവാദ സഖ്യങ്ങൾ ഗുണം ചെയ്യില്ലെന്നും പ്രമേയത്തിൽ പറയുന്നുണ്ട്. അധികാരം ഉപയോഗിച്ച് സമഗ്രമേഖലയിലും ബിജെപി കടന്നു കയറിയെന്നും സിപിഐ കുറ്റപ്പെടുത്തുന്നുണ്ട്. അതേസമയം തിരഞ്ഞെടുപ്പുകളെ സീസണലായി മാത്രം കാണരുതെന്നും പ്രമേയത്തിൽ പറയുന്നുണ്ട്.

തദ്ദേശ തിരഞ്ഞെടുപ്പിനെ ജനങ്ങളിലേക്ക് ആഴത്തിൽ ഇറങ്ങാനുള്ള അവസരം ആക്കി മാറ്റണമെന്നും പ്രമേയത്തിൽ പറയുന്നു. പ്രതീകാത്മക സ്ഥാനാർത്ഥിത്വങ്ങൾ ഒഴിവാക്കണമെന്നും നേതൃതലത്തിൽ പുതു തലമുറയെ വളർത്തി കൊണ്ടു വരണമെന്നും പ്രമേയത്തിൽ പറയുന്നു. സിപിഐക്ക് വേണ്ടത് സ്വയം നവീകരണം രൂപത്തിൽ മാത്രമല്ല ഉള്ളടക്കത്തിലും പൈതൃകം കാക്കണമെന്നും പുതുതലമുറ കമ്മ്യൂണിസ്റ്റുകൾക്ക് വഴി കാട്ടേണ്ടത് സിപിഐയാണെന്നും പ്രമേയത്തിൽ ചൂണ്ടിക്കാട്ടുന്നു.