കേരള സ്റ്റേറ്റ് റോഡ് ട്രാൻസ്പോർട്ട് കോർപ്പറേഷൻ (കെഎസ്ആർടിസി) പ്രതിദിന ടിക്കറ്റ് വരുമാനത്തിൽ വീണ്ടും ചരിത്രം കുറിച്ചു. 9.41 കോടി രൂപയുടെ കളക്ഷനാണ് ഒക്ടോബർ 6-ന് കെഎസ്ആർടിസി സ്വന്തമാക്കിയത്. കോർപ്പറേഷന്റെ ചരിത്രത്തിലെ രണ്ടാമത്തെ ഏറ്റവും വലിയ പ്രതിദിന ടിക്കറ്റ് വരുമാന നേട്ടമാണ് ഇത്.

ഈ വർഷം സെപ്റ്റംബർ 8-ാം തീയതി നേടിയ 10.19 കോടി രൂപയാണ് കെഎസ്ആർടിസിയുടെ എക്കാലത്തെയും ഉയർന്ന പ്രതിദിന ടിക്കറ്റ് വരുമാനം. ജീവനക്കാരുടെയും സൂപ്പർവൈസർമാരുടെയും ഓഫീസർമാരുടെയും ഏകോപിതമായ പരിശ്രമമാണ് തുടർച്ചയായ ഈ മുന്നേറ്റത്തിന് സഹായകരമായതെന്ന് കെഎസ്ആർടിസി അറിയിച്ചു.

ഗതാഗത വകുപ്പ് മന്ത്രിയുടെ കാലോചിതമായ പരിഷ്കരണ നടപടികളും കെഎസ്ആർടിസി മാനേജ്മെന്റിന്റെ നേതൃത്വത്തിൽ നടത്തിയ തുടർ പ്രവർത്തനങ്ങളും ഈ വലിയ മുന്നേറ്റത്തിന് നിർണ്ണായകമായി.

പുതിയ ബസുകളുടെ വരവും, സേവനങ്ങളിൽ വരുത്തിയ ഗുണപരമായ മാറ്റങ്ങളും യാത്രക്കാരിൽ വൻ സ്വീകാര്യത നേടിയിട്ടുണ്ട്. ഈ അഭിമാനകരമായ നേട്ടത്തിനായി സമർപ്പിതമായി പ്രവർത്തിച്ച ജീവനക്കാരോടും, വിശ്വാസ്യത പുലർത്തിയ യാത്രക്കാരോടും, പിന്തുണ നൽകിയ തൊഴിലാളി സംഘടനകളോടും കെഎസ്ആർടിസിയുടെ പേരിൽ നന്ദി അറിയിക്കുന്നതായി ചെയർമാൻ & മാനേജിംഗ് ഡയറക്ടർ വ്യക്തമാക്കി.