മുതിർന്ന കോൺഗ്രസ് നേതാവായ പി. ചിദംബരത്തിന്റെ, ‘ഓപ്പറേഷൻ ബ്ലൂസ്റ്റാർ’ സംബന്ധിച്ച പ്രസ്താവന കോൺഗ്രസ് നേതൃത്വത്തിൽ വലിയ അതൃപ്തി ഉണ്ടാക്കിയിരിക്കുന്നു. സുവർണ ക്ഷേത്രത്തിൽ സിഖ് തീവ്രവാദികളെ ഒഴിപ്പിക്കാൻ നടത്തിയ ‘ഓപ്പറേഷൻ ബ്ലൂസ്റ്റാർ’ തെറ്റായിരുന്നെന്ന പി. ചിദംബരത്തിന്റെ പ്രസ്താവനയിലാണ് കോൺഗ്രസ് നേതൃത്വത്തിന് അതൃപ്തി ഉണ്ടായിരിക്കുന്നത്.

അതേസമയം, സംഭവത്തിൽ ചിദംബരത്തെ പിന്തുണച്ചും കോൺഗ്രസിനെ വിമർശിച്ചും ബിജെപി രം​ഗത്ത് എത്തിയിട്ടുണ്ട്. പാർട്ടിനേതൃത്വത്തെ തുടർച്ചയായി പ്രതിസന്ധിയിലാക്കുന്ന പ്രസ്താവന നടത്തുന്നതിലാണ് നേതൃത്വത്തിന് അതൃപ്തി. ഓപ്പറേഷൻ ബ്ലൂസ്റ്റാർ ദേശീയാവശ്യമായിരുന്നില്ലെന്നും ഇന്ദിരാഗാന്ധിയുടെ ശരിയായ രാഷ്ട്രീയ ചരിത്രം രേഖപ്പെടുത്തണമെന്നും ബിജെപി വക്താവ് ആർ.പി. സിങ് പറഞ്ഞു..

സത്യം പറഞ്ഞതിന് ചിദംബരത്തിനെതിരേ കോൺഗ്രസ് നടപടിയെടുക്കുമോയെന്നും അദ്ദഹേം ചോദിച്ചു. 2008-ലെ മുംബൈ ഭീകരാക്രമണത്തിനുശേഷം പാകിസ്ഥാനെതിരേ തിരിച്ചടിക്കാൻ തനിക്ക് തോന്നിയിരുന്നെന്നും എന്നാൽ, വിദേശകാര്യമന്ത്രാലയത്തിന്റെ സമ്മർദം കാരണം നടന്നില്ലെന്നും ചിദംബരം ഈയിടെ വെളിപ്പെടുത്തിയിരുന്നു.