മുൻ എംപി രമ്യ ഹരിദാസിനെ ചിറയിൻകീഴ് മണ്ഡലത്തിൽ മത്സരിപ്പിക്കാനുള്ള നീക്കത്തിനെതിരെ കോൺഗ്രസ് നേതാക്കളുടെ പ്രതിഷേധം ശക്തമാകുന്നു. കോഴിക്കോട് സ്വദേശിയായ രമ്യയെ തിരുവനന്തപുരത്തെ ചിറയിൻകീഴ് മണ്ഡലത്തിൽ സ്ഥാനാർത്ഥിയാക്കാൻ ശ്രമിക്കുന്നുവെന്ന ആരോപണമാണ് ഉയരുന്നത്.

ഇതിനെതിരെ പ്രാദേശിക നേതാക്കൾ എഐസിസി നേതൃത്വത്തിന് പരാതി നൽകി. പട്ടികയിൽ ഉൾപ്പെട്ടിരുന്ന അജിത് കുമാർ, ജി. ലീന, അനൂപ്, മനോജ് മോഹൻ എന്നിവരാണ് കേന്ദ്ര നേതൃത്വത്തെ സമീപിച്ചത്.

തിരുവനന്തപുരത്തെ പ്രവർത്തകരുടെ വികാരങ്ങളെ അടൂർ പ്രകാശ് എംപി അവഗണിക്കുകയാണെന്നും പരാതിയിൽ ആരോപിക്കുന്നു. മുൻ തെരഞ്ഞെടുപ്പിലെ പരാജയത്തിന് പിന്നാലെ ഭയന്നോടിയാണ് രമ്യ ഹരിദാസ് തിരുവനന്തപുരത്തേക്ക് എത്തുന്നതെന്നും നേതാക്കൾ ആരോപിച്ചു. ഗ്രൗണ്ടിൽ ഇറങ്ങി പ്രവർത്തിക്കാതെ പാട്ടുപാടി പ്രചാരണം നടത്തി പരാജയപ്പെട്ട സ്ഥാനാർത്ഥിയാണെന്നും പരാതിയിൽ ചൂണ്ടിക്കാട്ടുന്നു.