ടെലഗ്രാഫ് പത്രാധിപൻ രാജഗോപാലിനെതിരായ കേന്ദ്രസർക്കാരിന്റെ നടപടികൾക്കെതിരെ ജനാധിപത്യ സമൂഹം ശക്തമായി പ്രതികരിക്കണമെന്ന് സിപിഐ സംസ്ഥാന സെക്രട്ടറി ബിനോയ് വിശ്വം. വിഷയത്തിൽ ഇടപെടണമെന്ന് ആവശ്യപ്പെട്ട് പ്രധാനമന്ത്രി നരേന്ദ്ര മോദിക്ക് സിപിഐ കത്ത് നൽകിയിട്ടുണ്ടെന്നും അദ്ദേഹം പറഞ്ഞു.

രാജഗോപാലിനെതിരെ ജനാധിപത്യവിരുദ്ധ ശക്തികൾ ഏകോപിതമായി നീങ്ങുകയാണെന്നും മാധ്യമസ്വാതന്ത്ര്യത്തിനും ജനാധിപത്യ മൂല്യങ്ങൾക്കും നേരെയുള്ള വെല്ലുവിളിയായാണ് ഇത്തരം നടപടികളെ കാണേണ്ടതെന്നും ബിനോയ് വിശ്വം അഭിപ്രായപ്പെട്ടു.

അതേസമയം, പിഎം ശ്രീ പദ്ധതിയുമായി ബന്ധപ്പെട്ട് സിപിഐയുടെയും സിപിഐഎമ്മിന്റെയും നിലപാട് ഒരുപോലെയാണെന്നും അദ്ദേഹം വ്യക്തമാക്കി. ആർഎസ്എസ് അജണ്ടയ്ക്കൊപ്പം കോൺഗ്രസും മുസ്ലിം ലീഗും പോകാൻ സാധ്യതയുണ്ടെങ്കിലും സിപിഐഎം അത്തരമൊരു നിലപാട് സ്വീകരിച്ചിട്ടില്ലെന്ന് അദ്ദേഹം പറഞ്ഞു.

സിപിഐയെ അറിയിക്കാതെയാണ് സിപിഐഎം പിഎം ശ്രീ പദ്ധതിയിൽ ഒപ്പുവെച്ചതെന്ന യുഡിഎഫിന്റെ ആരോപണം അടിസ്ഥാനരഹിതമാണെന്നും ബിനോയ് വിശ്വം പറഞ്ഞു. പദ്ധതിയിലൂടെ കേരളത്തിന് ഇതുവരെ സാമ്പത്തിക സഹായം ലഭിച്ചിട്ടില്ലെന്നും അദ്ദേഹം കൂട്ടിച്ചേർത്തു.