മുഖ്യമന്ത്രി പിണറായി വിജയനെതിരെ എൻഫോഴ്സ്മെന്റ് ഡയറക്ടറേറ്റ് (ഇ.ഡി.) ശുപാർശയുടെ അടിസ്ഥാനത്തിൽ കേസെടുക്കാമെന്ന നിയമോപദേശം ലഭിച്ചെന്ന റിപ്പോർട്ടുകൾക്കിടെ പ്രതികരണവുമായി സി.പി.ഐ. സംസ്ഥാന സെക്രട്ടറി ബിനോയ് വിശ്വം. വിഷയം പൂർണമായി പഠിച്ചശേഷം മാത്രമേ കൂടുതൽ പ്രതികരിക്കുകയുള്ളൂവെന്ന് അദ്ദേഹം വ്യക്തമാക്കി.
എൽ.ഡി.എഫിനെയോ സി.പി.ഐ.എമ്മിനെയോ രാഷ്ട്രീയമായി വേട്ടയാടാനുള്ള ശ്രമങ്ങൾ ഉണ്ടാകുകയാണെങ്കിൽ അത് അംഗീകരിക്കില്ലെന്നും ബിനോയ് വിശ്വം മുന്നറിയിപ്പ് നൽകി. അതേസമയം, കേസും നിയമനടപടികളും നിയമപരമായ രീതിയിൽ മുന്നോട്ടുപോകട്ടെയെന്ന നിലപാടും അദ്ദേഹം ആവർത്തിച്ചു.
കേസ് രാഷ്ട്രീയ പ്രേരിതമാണോയെന്ന മാധ്യമപ്രവർത്തകരുടെ ചോദ്യത്തിന്, വിഷയം ഇപ്പോൾ പഠിച്ചുവരികയാണെന്നായിരുന്നു ബിനോയ് വിശ്വത്തിന്റെ മറുപടി. വിഷയത്തിൽ സി.പി.ഐയുടെ നിലപാട് മുമ്പ് തന്നെ വ്യക്തമാക്കിയിട്ടുണ്ടെന്നും അത് വീണ്ടും വീണ്ടും ആവർത്തിക്കേണ്ട സാഹചര്യമില്ലെന്നും അദ്ദേഹം പറഞ്ഞു.
ഇ.ഡി.യുടെ നടപടി രാഷ്ട്രീയ വേട്ടയാടലിന്റെ ഭാഗമാണോയെന്ന കാര്യത്തിൽ ഇപ്പോൾ അഭിപ്രായപ്പെടാൻ താൻ തയ്യാറല്ലെന്നും, അതിനെക്കുറിച്ചുള്ള വിലയിരുത്തൽ മാധ്യമങ്ങൾക്കും പൊതുസമൂഹത്തിനും വിടുകയാണെന്നും അദ്ദേഹം കൂട്ടിച്ചേർത്തു.
മുഖ്യമന്ത്രിക്കെതിരായ ഇ.ഡി. ശുപാർശയെ ചൊല്ലി രാഷ്ട്രീയ രംഗത്ത് ചർച്ചകൾ ശക്തമാകുന്നതിനിടെയാണ് സിപിഐ സംസ്ഥാന സെക്രട്ടറിയുടെ പ്രതികരണം. വിഷയം വിശദമായി പരിശോധിച്ച ശേഷമായിരിക്കും പാർട്ടി ഔദ്യോഗിക നിലപാട് കൂടുതൽ വ്യക്തമാക്കുകയെന്നാണ് അദ്ദേഹത്തിന്റെ വാക്കുകൾ സൂചിപ്പിക്കുന്നത്.
