ജന്തർ മന്തറിലെ സമരപ്പന്തലിൽ നിന്ന് ഡൽഹി പൊലീസ് ബലംപ്രയോഗിച്ച് നീക്കം ചെയ്ത ശേഷം സഫ്ദർജംഗ് ആശുപത്രിയിൽ പ്രവേശിപ്പിച്ച സോനം വാങ്‌ചുക്കിന്റെ ആരോഗ്യനില സംബന്ധിച്ച് ആശുപത്രി അധികൃതർ വിശദമായ മെഡിക്കൽ റിപ്പോർട്ട് പുറത്തുവിട്ടു. ദീർഘനാളത്തെ നിരാഹാര സമരത്തെ തുടർന്ന് അദ്ദേഹത്തിന് കടുത്ത നിർജ്ജലീകരണവും ശാരീരിക ബലഹീനതയും അനുഭവപ്പെടുന്നുണ്ടെന്ന് ആശുപത്രി അധികൃതർ അറിയിച്ചു.

നിലവിൽ ആരോഗ്യനില സ്ഥിരതയിലാണെങ്കിലും ശരീരത്തിലെ സുപ്രധാന പാരാമീറ്ററുകൾ സാധാരണ നിലയിലേക്ക് എത്തിക്കാൻ തുടർച്ചയായ നിരീക്ഷണവും വിദഗ്ധ ചികിത്സയും ആവശ്യമാണ്. ഇതിനായി രണ്ട് ഡോക്ടർമാരും പാരാമെഡിക്കൽ ജീവനക്കാരും ഉൾപ്പെടുന്ന പ്രത്യേക മെഡിക്കൽ സംഘത്തെ സഫ്ദർജംഗ് ആശുപത്രിയിൽ നിയോഗിച്ചിട്ടുണ്ട്.

അതേസമയം, വാങ്‌ചുക്കിന്റെ ആരോഗ്യനിലയിൽ കുടുംബവും സമരസമിതിയും ആശങ്ക പ്രകടിപ്പിച്ചു. അദ്ദേഹത്തിന്റെ സമ്മതമില്ലാതെ യാതൊരു മരുന്നും നൽകരുതെന്ന് ഭാര്യ ഗീതാഞ്ജലി ജെ. ആങ്മോ എക്‌സിലൂടെ ആവശ്യപ്പെട്ടു.

വാങ്‌ചുക്കിനെ ആശുപത്രിയിലേക്ക് മാറ്റിയതോടെ സമരം അവസാനിക്കുമെന്ന് സർക്കാർ കരുതുന്നുണ്ടെങ്കിൽ അത് തെറ്റിദ്ധാരണയാണെന്ന് കോക്രോച്ച് ജനതാ പാർട്ടി സ്ഥാപകൻ അഭിജീത് ദിപ്കെ പ്രതികരിച്ചു. ജൂലൈ 20-ന് പാർലമെന്റിലേക്കുള്ള മാർച്ച് നിശ്ചയിച്ച പ്രകാരം തന്നെ നടക്കുമെന്നും അദ്ദേഹം വ്യക്തമാക്കി. കൂടാതെ, നേരത്തെ കേന്ദ്ര വിദ്യാഭ്യാസ മന്ത്രി ധർമേന്ദ്ര പ്രധാന്റെ രാജി മാത്രമായിരുന്നു ആവശ്യപ്പെട്ടിരുന്നതെങ്കിൽ, ഇപ്പോൾ പ്രധാനമന്ത്രി നരേന്ദ്ര മോദിയുടെ രാജിയും ആവശ്യപ്പെടുന്നതായി അദ്ദേഹം പ്രഖ്യാപിച്ചു.

സംഭവത്തിൽ പ്രതിപക്ഷ പാർട്ടികളും സർക്കാരിനെതിരെ രൂക്ഷ വിമർശനവുമായി രംഗത്തെത്തി. പേപ്പർ ചോർച്ചയ്‌ക്കെതിരെ പ്രതിഷേധിക്കുന്നവരെ ബലംപ്രയോഗിച്ച് അടിച്ചമർത്തുന്നത് സർക്കാരിന്റെ ഭീരുത്വമാണെന്ന് ആം ആദ്മി പാർട്ടി നേതാവ് മനീഷ് സിസോദിയ ആരോപിച്ചു. വിദ്യാർത്ഥികളുടെ യഥാർഥ പ്രശ്നങ്ങൾ പരിഹരിക്കുന്നതിന് പകരം സർക്കാർ പ്രതിഷേധങ്ങളെ അടിച്ചമർത്തുകയാണെന്ന് എൻസിപി (എസ്.പി.) നേതാവ് ശരദ് പവാറും വിമർശിച്ചു. വാങ്‌ചുക്കിനെതിരെ നടപടിയെടുത്താലും പ്രതിഷേധം കൂടുതൽ ശക്തമായി തുടരുമെന്നും അദ്ദേഹം പറഞ്ഞു. പ്രതിപക്ഷത്തിന്റെ വിമർശനങ്ങൾക്കിടയിലും വിഷയത്തിൽ കേന്ദ്ര സർക്കാർ ഇതുവരെ ഔദ്യോഗിക പ്രതികരണം നടത്തിയിട്ടില്ല.