ജമ്മു കശ്മീരിന്റെ പ്രത്യേക ഭരണഘടനാ പദവി റദ്ദാക്കിയ കേന്ദ്ര സർക്കാരിന്റെ 2019 ഓഗസ്റ്റ് 5ലെ തീരുമാനത്തിനെതിരെ ഓഗസ്റ്റ് 5ന് ശ്രീനഗറിലെ ലാൽ ചൗക്കിൽ പ്രതിഷേധ പ്രകടനം സംഘടിപ്പിക്കുമെന്ന് സിപിഐ എം ജമ്മു കശ്മീർ നേതൃത്വം അറിയിച്ചു.

ദക്ഷിണ കശ്മീരിലെ കുൽഗാമിൽ നടത്തിയ വാർത്താസമ്മേളനത്തിൽ പാർട്ടി സംസ്ഥാന സെക്രട്ടറി മുഹമ്മദ് അബ്ബാസ് റാത്തർ ആണ് പ്രഖ്യാപനം നടത്തിയത്. ജമ്മു കശ്മീരിന്റെ പ്രത്യേക പദവി എടുത്തുകളഞ്ഞതും സംസ്ഥാനത്തെ ജമ്മു കശ്മീർ, ലഡാക്ക് എന്നീ കേന്ദ്രഭരണ പ്രദേശങ്ങളായി വിഭജിച്ചതും ജനങ്ങളുടെ സമ്മതമില്ലാതെയാണെന്ന് അദ്ദേഹം ആരോപിച്ചു.

ഈ തീരുമാനം അന്നും അംഗീകരിച്ചിരുന്നില്ലെന്നും ഇപ്പോഴും അംഗീകരിക്കുന്നില്ലെന്നും റാത്തർ പറഞ്ഞു. ജനാധിപത്യപരവും സമാധാനപരവുമായ മാർഗങ്ങളിലൂടെ പ്രതിഷേധം തുടരുമെന്നും അദ്ദേഹം വ്യക്തമാക്കി.