കനത്ത മഴയെ തുടർന്ന് വളപട്ടണം പുഴയിലെ ജലനിരപ്പും ഒഴുക്കും ഉയർന്ന സാഹചര്യത്തിൽ പറശ്ശിനിക്കടവ്–വളപട്ടണം ബോട്ട് സർവീസ് താൽക്കാലികമായി നിർത്തിവെച്ചു. സംസ്ഥാന ജലഗതാഗത വകുപ്പാണ് ഇക്കാര്യം അറിയിച്ചത്.പറശ്ശിനിക്കടവ് ബോട്ട് ടെർമിനലിൽ വെള്ളം ഉയർന്നതും, മഴവെള്ളത്തിനൊപ്പം വൻതോതിൽ മരത്തടികൾ ഒഴുകിയെത്തുന്നതും ബോട്ടുകൾക്ക് കേടുപാടുകൾ സംഭവിക്കാനുള്ള സാധ്യത വർധിപ്പിക്കുന്നതിനാലാണ് സർവീസ് നിർത്തിവെച്ചതെന്ന് അധികൃതർ അറിയിച്ചു.

സുരക്ഷാ കാരണങ്ങളാൽ ഇന്ന് ഈ റൂട്ടിൽ ബോട്ട് സർവീസ് ഉണ്ടായിരിക്കില്ലെന്നും സാഹചര്യം വിലയിരുത്തിയ ശേഷമേ സർവീസ് പുനരാരംഭിക്കുകയുള്ളുവെന്നും അധികൃതർ വ്യക്തമാക്കി.
അതേസമയം, മാട്ടൂൽ–അഴീക്കൽ (ബോട്ട് പാലം) ഫെറി സർവീസ് തടസ്സങ്ങളില്ലാതെ പതിവുപോലെ തുടരുന്നതായി ജലഗതാഗത വകുപ്പ് പറശ്ശിനിക്കടവ് സ്റ്റേഷൻ മാസ്റ്റർ അറിയിച്ചു.