സംസ്ഥാനത്ത് മഴ ശക്തമായി തുടരുന്നതിനിടെ ദുരിതാശ്വാസ പ്രവർത്തനങ്ങളിലും മുന്നറിയിപ്പുകൾ നൽകുന്നതിലും സർക്കാരിന് ഗുരുതര വീഴ്ചയുണ്ടായെന്ന് സിപിഐഎം മുഖപത്രമായ ദേശാഭിമാനിയുടെ മുഖപ്രസംഗം. ദുരിതാശ്വാസ പ്രവർത്തനങ്ങൾ ഏകോപിപ്പിക്കാൻ ആവശ്യമായ നേതൃത്വമില്ലാത്ത അവസ്ഥയാണ് നിലവിലുള്ളതെന്നും സർക്കാർ സംവിധാനങ്ങൾ കാര്യക്ഷമമായി പ്രവർത്തിക്കുന്നില്ലെന്നും ലേഖനം വിമർശിക്കുന്നു.

വ്യാപകമായ മഴക്കെടുതിയും ദുരന്തസാഹചര്യങ്ങളും ഉണ്ടായ ദിവസങ്ങളിൽ മുഖ്യമന്ത്രി വി.ഡി. സതീശൻ വിവിധ ജില്ലകളിലെ സ്വകാര്യ പരിപാടികളിൽ പങ്കെടുത്തിരുന്നതായും മുഖപ്രസംഗം ചൂണ്ടിക്കാട്ടുന്നു. മലപ്പുറത്തെ വിരുന്ന് സൽക്കാരങ്ങളിലും ക്ഷേത്രദർശനത്തിലും മുഖ്യമന്ത്രി തിരക്കിലായിരുന്നുവെന്ന വിമർശനം സാമൂഹിക മാധ്യമങ്ങളിലെ ഇടതുപക്ഷ അനുകൂല പ്രൊഫൈലുകൾ ഉയർത്തിയതിന് പിന്നാലെയാണ് ദേശാഭിമാനിയിലും സമാന വിമർശനം പ്രത്യക്ഷപ്പെട്ടത്.

മുഖ്യമന്ത്രി വ്യക്തിപരമായ ആവശ്യങ്ങൾക്കായി ഹെലികോപ്റ്റർ ഉപയോഗിച്ചെന്ന ആരോപണവും ശക്തമായി ഉയരുന്നുണ്ടെന്ന് ലേഖനം പരാമർശിക്കുന്നു. മഴക്കെടുതികളെ നേരിടുന്നതിൽ നിലവിലെ സർക്കാർ പരാജയപ്പെട്ടുവെന്ന സൂചന നൽകിക്കൊണ്ട് മുൻ സർക്കാരിന്റെ പ്രവർത്തനങ്ങളുമായി താരതമ്യം ചെയ്തും വിമർശനം തുടരുന്നു.

കഴിഞ്ഞ ദിവസം ഉണ്ടായ ശക്തമായ മഴയുടെയും അതിനെ തുടർന്നുണ്ടായ ദുരന്തങ്ങളുടെയും വിശദാംശങ്ങൾ മാധ്യമങ്ങളുമായി പങ്കുവെക്കാൻ പോലും മുഖ്യമന്ത്രി തയ്യാറായില്ലെന്നാണ് മുഖപ്രസംഗത്തിലെ മറ്റൊരു ആരോപണം. മഴക്കാലത്തിന് മുന്നോടിയായി നടത്തേണ്ട ശുചീകരണ പ്രവർത്തനങ്ങളും കാര്യക്ഷമമായി നടന്നില്ലെന്നും അതിന്റെ പ്രത്യാഘാതമാണ് ഇപ്പോഴത്തെ സാഹചര്യമെന്നും ലേഖനം വിലയിരുത്തുന്നു.

ഇത്തരമൊരു പ്രതിസന്ധി ഘട്ടത്തിൽ അതിവേഗം പ്രവർത്തിക്കേണ്ട സർക്കാർ സംവിധാനങ്ങൾ മരവിച്ച നിലയിലാണെന്നും ദുരിതാശ്വാസ പ്രവർത്തനങ്ങൾക്ക് നേതൃത്വം നൽകാൻ ആരുമില്ലാത്ത അവസ്ഥയാണെന്നും മുഖപ്രസംഗം കുറ്റപ്പെടുത്തുന്നു. ദുരിതാശ്വാസ ക്യാമ്പുകളിലുള്ള ജനങ്ങൾക്ക് ആവശ്യമായ അടിസ്ഥാനസാധനങ്ങൾ പോലും സമയബന്ധിതമായി എത്തിക്കാൻ സർക്കാരിന് കഴിയുന്നില്ലെന്നും ലേഖനത്തിൽ വിമർശനം ഉന്നയിക്കുന്നു.