ലഹരിക്കേസിൽ അറസ്റ്റിലായ വ്യക്തി മുഖ്യമന്ത്രിയുടെ സോഷ്യൽ മീഡിയ കോ-ഓർഡിനേറ്ററാണെന്ന് സിപിഎം സംസ്ഥാന സെക്രട്ടറി എം.വി. ഗോവിന്ദൻ മാസ്റ്റർ ആരോപിച്ചു. സംഭവം അതീവ ഗൗരവമുള്ളതാണെന്നും ബന്ധപ്പെട്ടവരുടെ ദൃശ്യങ്ങൾ ഉൾപ്പെടെയുള്ള തെളിവുകൾ പുറത്തുവിട്ടുകൊണ്ടാണ് അദ്ദേഹം വാർത്താസമ്മേളനത്തിൽ ആരോപണം ഉന്നയിച്ചത്.

മുഖ്യമന്ത്രിയുടെ ഓഫീസിലെ സ്ഥിരം സന്ദർശകരാണ് പിടിയിലായവരെന്നും, ലഹരിവിരുദ്ധ പ്രവർത്തനങ്ങൾക്ക് നേതൃത്വം നൽകേണ്ടവർ തന്നെ ലഹരിക്കടത്തിൽ ഉൾപ്പെട്ടിരിക്കുന്നുവെന്നുമാണ് അദ്ദേഹത്തിന്റെ വിമർശനം. വിഷയവുമായി ബന്ധപ്പെട്ട ദൃശ്യങ്ങൾ സോഷ്യൽ മീഡിയയിൽ നിന്ന് നീക്കം ചെയ്യാൻ മെറ്റയെ സമീപിച്ചതായും അദ്ദേഹം പറഞ്ഞു.

കടലിൽ കാണാതാകുന്ന മത്സ്യത്തൊഴിലാളികളുടെ കുടുംബങ്ങൾക്ക് ധനസഹായം നൽകുന്നതുമായി ബന്ധപ്പെട്ട് പ്രതിപക്ഷ നേതാവ് വി.ഡി. സതീശൻ നടത്തിയ പരാമർശങ്ങളും എം.വി. ഗോവിന്ദൻ മാസ്റ്റർ തള്ളി. ഓഖി ദുരന്തകാലത്ത് നിലവിലെ ചട്ടങ്ങൾ മറികടന്നാണ് സഹായം നൽകിയതെന്നും, ഏഴ് വർഷം കാത്തിരിക്കണമെന്ന വ്യവസ്ഥ ഇപ്പോഴാണ് ആദ്യമായി മാറ്റിയതെന്ന വാദം ശരിയല്ലെന്നും അദ്ദേഹം പറഞ്ഞു. മത്സ്യത്തൊഴിലാളികൾക്ക് സാറ്റലൈറ്റ് ഫോണുകളും റീചാർജ് സൗകര്യങ്ങളും നൽകണമെന്നും, രക്ഷാപ്രവർത്തനത്തിനായി പരിശീലനം നേടിയവരെ തിരിച്ചെടുക്കണമെന്നും അദ്ദേഹം ആവശ്യപ്പെട്ടു.

ടി.ജെ. മോഹൻദാസിന്റെ അറസ്റ്റിലും പൊലീസ് വീഴ്ച സംഭവിച്ചുവെന്ന് എം.വി. ഗോവിന്ദൻ മാസ്റ്റർ ആരോപിച്ചു. അറസ്റ്റ് വൈകിപ്പിച്ചതും ജാമ്യം ലഭിക്കാൻ സഹായകമായ നിലപാടുകളാണ് പൊലീസ് സ്വീകരിച്ചതെന്നും അദ്ദേഹം പറഞ്ഞു. പൊലീസ് അന്വേഷണത്തിലെ പിഴവുകൾ ചൂണ്ടിക്കാട്ടിയാണ് കോടതിയിൽ ജാമ്യം ലഭിച്ചതെന്നും അദ്ദേഹം ആരോപിച്ചു.

സംസ്ഥാന ഭരണ സംവിധാനത്തിൽ വ്യാപകമായ സ്ഥലംമാറ്റങ്ങളാണ് നടക്കുന്നതെന്നും, അധികാരത്തിന്റെ അഹങ്കാരം ഉദ്യോഗസ്ഥരിലേക്കും വ്യാപിച്ചിരിക്കുകയാണെന്നും എം.വി. ഗോവിന്ദൻ മാസ്റ്റർ വിമർശിച്ചു. കാസർകോട് കളക്ട്രേറ്റിലെ ജീവനക്കാരന്റെ ആത്മഹത്യയെയും അദ്ദേഹം ഈ സാഹചര്യവുമായി ബന്ധപ്പെടുത്തി.