കേന്ദ്രസർക്കാരിനെതിരെ സെപ്റ്റംബർ 1-ന് ഡൽഹിയിൽ സംഘടിപ്പിക്കുന്ന പ്രതിഷേധ സമരത്തിനായി സി.പി.ഐ ബുക്ക് ചെയ്തിരുന്ന പ്രത്യേക ട്രെയിനുകൾ റദ്ദാക്കിയതായി പാർട്ടി സംസ്ഥാന സെക്രട്ടറി ബിനോയ് വിശ്വം ആരോപിച്ചു. സമരത്തെ നേരിടാൻ കേന്ദ്രസർക്കാർ ജനാധിപത്യവിരുദ്ധ മാർഗങ്ങൾ സ്വീകരിക്കുകയാണെന്നും അദ്ദേഹം വാർത്താസമ്മേളനത്തിൽ പറഞ്ഞു.

രാജ്യത്തിന്റെ വിവിധ സംസ്ഥാനങ്ങളിൽ നിന്നായി ഒരു ലക്ഷം പ്രവർത്തകരെ പങ്കെടുപ്പിക്കാനായിരുന്നു പാർട്ടിയുടെ പദ്ധതി. ഇതിനായി കേരളം ഉൾപ്പെടെ നിരവധി സംസ്ഥാനങ്ങളിൽ നിന്ന് പ്രത്യേക ട്രെയിനുകൾ ബുക്ക് ചെയ്തിരുന്നു. കേരളത്തിൽ നിന്ന് 22 ബോഗികളുള്ള പ്രത്യേക ട്രെയിനിനായി ഏകദേശം പത്ത് ലക്ഷം രൂപ അഡ്വാൻസായി അടച്ചിരുന്നുവെന്നും ബിനോയ് വിശ്വം വ്യക്തമാക്കി.

എന്നാൽ അടച്ച തുക തിരിച്ചുകിട്ടിയതോടെയാണ് ട്രെയിൻ റദ്ദാക്കിയ വിവരം അറിയുന്നതെന്ന് അദ്ദേഹം പറഞ്ഞു. തമിഴ്നാട്, തെലങ്കാന, ആന്ധ്രാപ്രദേശ് തുടങ്ങിയ സംസ്ഥാനങ്ങളിൽ നിന്ന് ബുക്ക് ചെയ്തിരുന്ന പ്രത്യേക ട്രെയിനുകൾക്കും സമാന സാഹചര്യമാണുണ്ടായതെന്നും അദ്ദേഹം ആരോപിച്ചു.

“എന്ത് ന്യായീകരണം പറഞ്ഞാലും ഇതിന് പിന്നിൽ രാഷ്ട്രീയ കാരണങ്ങളാണെന്ന് വ്യക്തമാണ്. പ്രതിഷേധ ശബ്ദങ്ങളെ അടിച്ചമർത്താനുള്ള ശ്രമമായാണ് ഇതിനെ കാണുന്നത്,” ബിനോയ് വിശ്വം പറഞ്ഞു.

അതേസമയം, ട്രെയിനുകൾ റദ്ദാക്കിയെങ്കിലും സമരത്തിൽ നിന്ന് പിന്നോട്ടില്ലെന്ന് അദ്ദേഹം വ്യക്തമാക്കി. ലഭ്യമായ എല്ലാ മാർഗങ്ങളും ഉപയോഗിച്ച് കേരളത്തിൽ നിന്നുള്ള നേതാക്കളും പ്രവർത്തകരും ഡൽഹിയിലെത്തുമെന്നും അദ്ദേഹം പറഞ്ഞു.

ട്രെയിൻ റദ്ദാക്കിയതിൽ പ്രതിഷേധിച്ച് സംസ്ഥാനത്തെ പ്രധാന റെയിൽവേ സ്റ്റേഷനുകളിലേക്ക് ഇന്ന് മാർച്ചുകൾ സംഘടിപ്പിക്കുമെന്നും സി.പി.ഐ നേതൃത്വം അറിയിച്ചു.

ഇതിനൊപ്പം നിയമസഭയിലെ ഉപനേതൃസ്ഥാനം സംബന്ധിച്ച ആവശ്യത്തിൽ നിന്ന് പാർട്ടി പിന്നോട്ടില്ലെന്നും, വിഷയം എൽ.ഡി.എഫ് യോഗത്തിൽ ഉന്നയിക്കുമെന്നും ബിനോയ് വിശ്വം കൂട്ടിച്ചേർത്തു.