കേന്ദ്ര സർക്കാർ പാർലമെന്റിൽ പാസാക്കിയ മൈൻസ് ആൻഡ് മിനറൽസ് ഭേദഗതി ബില്ലിനെതിരെ പ്രതിപക്ഷ നേതാവ് പിണറായി വിജയൻ രംഗത്തെത്തി. ഇന്ത്യൻ ഭരണഘടന ഉറപ്പുനൽകുന്ന ഫെഡറൽ തത്ത്വങ്ങളെ ഈ ബിൽ പൂർണമായും അവഗണിക്കുന്നതാണെന്ന് അദ്ദേഹം ആരോപിച്ചു. ഭേദഗതിയിലെ വ്യവസ്ഥകൾ ഭരണഘടനയുടെ അടിസ്ഥാന തത്വങ്ങൾക്ക് വിരുദ്ധമാണെന്നും, അതിനാൽ സംസ്ഥാന സർക്കാർ സുപ്രീം കോടതിയെ സമീപിക്കാൻ തയ്യാറാകണമെന്നും അദ്ദേഹം ആവശ്യപ്പെട്ടു.

ഖനനാവകാശങ്ങളിലും ധാതുവിഭവങ്ങളുള്ള ഭൂമിയിലും അധിക നികുതിയോ സെസ്സോ ഈടാക്കാനുള്ള സംസ്ഥാനങ്ങളുടെ ഭരണഘടനാപരമായ അവകാശത്തെ ബിൽ നിയന്ത്രിക്കുന്നുവെന്ന് പിണറായി വിജയൻ പറഞ്ഞു. ഭരണഘടനയുടെ ഏഴാം ഷെഡ്യൂൾ പ്രകാരം ഭൂമിയും അതിലെ വിഭവങ്ങളും സംസ്ഥാനങ്ങളുടെ അധികാരപരിധിയിൽ വരുന്ന വിഷയങ്ങളാണെന്നും, ഇതിൽ കേന്ദ്ര നിയന്ത്രണം അടിച്ചേൽപ്പിക്കുന്നത് ഫെഡറലിസത്തിന് മേലുള്ള കടന്നുകയറ്റമാണെന്നും അദ്ദേഹം വിമർശിച്ചു.

രാജ്യത്തിന്റെ വിലമതിക്കാനാകാത്ത ധാതുസമ്പത്ത് സ്വകാര്യ കുത്തകകൾക്ക് കൈമാറാനുള്ള ശ്രമമാണ് പുതിയ ഭേദഗതിയിലൂടെ നടക്കുന്നതെന്നും അദ്ദേഹം ആരോപിച്ചു. തന്ത്രപ്രധാനമായ അപൂർവ ധാതുക്കളുടെ ഖനനം ഉൾപ്പെടെ സ്വകാര്യ മേഖലയ്ക്ക് തുറന്നുകൊടുത്ത് പൊതുമേഖലാ സ്ഥാപനങ്ങളെ ദുർബലപ്പെടുത്താനാണ് കേന്ദ്ര സർക്കാർ ശ്രമിക്കുന്നതെന്ന് അദ്ദേഹം പറഞ്ഞു.

അതേസമയം, കേന്ദ്രത്തിന്റെ സ്വകാര്യവത്കരണ നയങ്ങൾക്ക് അനുകൂലമായ സമീപനമാണ് കേരള സർക്കാരും സ്വീകരിക്കുന്നതെന്ന് പിണറായി വിജയൻ കുറ്റപ്പെടുത്തി. ‘റെയർ എർത്ത് ഇടനാഴി’ പദ്ധതിയുടെ പേരിൽ കേരളത്തിന്റെ തീരദേശ ധാതുസമ്പത്ത് സ്വകാര്യ കമ്പനികൾക്ക് കൈമാറാനുള്ള ശ്രമമാണ് നടക്കുന്നതെന്നും അദ്ദേഹം ആരോപിച്ചു.

ലാഭത്തിൽ പ്രവർത്തിക്കുന്ന പൊതുമേഖലാ സ്ഥാപനമായ കെഎംഎംഎല്ലിനെ പ്രതിസന്ധിയിലാക്കി പ്രവർത്തനം അവസാനിപ്പിക്കാനും, അതിന്റെ സ്ഥാനത്ത് സ്വകാര്യ ലോബികളെ കൊണ്ടുവരാനുമുള്ള ആസൂത്രിത നീക്കമാണ് നടക്കുന്നതെന്നും അദ്ദേഹം പറഞ്ഞു. ഇത്തരം നീക്കങ്ങൾ ശക്തമായി ചെറുക്കേണ്ടതുണ്ടെന്നും പിണറായി വിജയൻ കൂട്ടിച്ചേർത്തു.