തെരഞ്ഞെടുപ്പ് കമ്മീഷൻ ചീഫ് ഇലക്ഷൻ കമ്മീഷണർ ഗ്യാനേഷ് കുമാറിന് കീഴിലുള്ള ഏകാധിപത്യ സംവിധാനമായി മാറിയിരിക്കുകയാണെന്ന് സി.പി.എം രാജ്യസഭാ എം.പി ജോൺ ബ്രിട്ടാസ് ആരോപിച്ചു. വോട്ടർപട്ടിക പരിഷ്‌കരണവുമായി ബന്ധപ്പെട്ട് രണ്ട് തെരഞ്ഞെടുപ്പ് കമ്മീഷണർമാർ 10 മാസത്തിനിടെ 14 തവണ ഔപചാരികമായി വിയോജിപ്പ് രേഖപ്പെടുത്തിയെന്ന റിപ്പോർട്ടിന്റെ പശ്ചാത്തലത്തിലാണ് ബ്രിട്ടാസിന്റെ പ്രതികരണം.

പുതിയ വോട്ടർമാരെ ചേർക്കുന്നതും വ്യാപകമായി വോട്ടർമാരെ പട്ടികയിൽനിന്ന് നീക്കം ചെയ്യുന്നതും അനധികൃതവും നിയമവിരുദ്ധവുമാണെന്ന് കമ്മീഷണർമാർ രേഖപ്പെടുത്തിയതായാണ് ബ്രിട്ടാസ് ആരോപിച്ചത്. രഹസ്യമായി പേരുകൾ നീക്കം ചെയ്യൽ, പിന്നീട് പുനഃസ്ഥാപിക്കൽ, ഫോം 6-ൽ വരുത്തിയ മാറ്റങ്ങൾ തുടങ്ങിയ നടപടികളിലും എതിർപ്പ് രേഖപ്പെടുത്തിയതായും അദ്ദേഹം പറഞ്ഞു. ഇത്തരം നടപടികൾ ആദ്യമായി വോട്ട് ചെയ്യാനെത്തുന്ന യുവാക്കൾക്ക് ബുദ്ധിമുട്ടുണ്ടാക്കുന്നുവെന്നും ബ്രിട്ടാസ് ആരോപിച്ചു.

തെരഞ്ഞെടുപ്പ് കമ്മീഷനിലെ മറ്റ് രണ്ട് കമ്മീഷണർമാരെ തീരുമാനങ്ങളുടെ കാര്യത്തിൽ ഇരുട്ടിൽ നിർത്തിയെന്ന ആരോപണവും അദ്ദേഹം ഉന്നയിച്ചു. തെരഞ്ഞെടുപ്പ് കമ്മീഷന്റെ സ്ഥാപനപരമായ സ്വാതന്ത്ര്യത്തെയും രാജ്യത്തെ ജനാധിപത്യ സംവിധാനത്തെയും ബാധിക്കുന്ന നടപടികളാണ് നടക്കുന്നതെന്നും ബ്രിട്ടാസ് പറഞ്ഞു.

ചീഫ് ഇലക്ഷൻ കമ്മീഷണർ ഗ്യാനേഷ് കുമാറിനെ നീക്കുന്നതിനുള്ള നടപടികൾ പാർലമെന്റ് അടിയന്തരമായി ആരംഭിക്കണമെന്നും അദ്ദേഹം ആവശ്യപ്പെട്ടു. 2026 ഏപ്രിൽ 24ന് തന്നെ ഗ്യാനേഷ് കുമാറിനെ നീക്കുന്നതിനുള്ള നോട്ടീസ് നൽകിയിരുന്നുവെന്നും ഏകദേശം 70 അംഗങ്ങൾ അതിൽ ഒപ്പുവെച്ചിരുന്നുവെന്നും ബ്രിട്ടാസ് അവകാശപ്പെട്ടു.

സ്പെഷ്യൽ ഇന്റൻസീവ് റിവിഷൻ (SIR) നടപടിക്രമം പൂർണമായും റദ്ദാക്കാൻ സുപ്രീം കോടതി അടിയന്തരമായി ഇടപെടണമെന്നും ബ്രിട്ടാസ് ആവശ്യപ്പെട്ടു. മൂന്ന് കമ്മീഷണർമാരിൽ രണ്ടുപേർ എസ്‌ഐആർ നടപടികളുമായി ബന്ധപ്പെട്ട് എതിർപ്പ് രേഖപ്പെടുത്തിയെന്ന റിപ്പോർട്ടിന്റെ അടിസ്ഥാനത്തിലാണ് അദ്ദേഹത്തിന്റെ ആവശ്യം. അതേസമയം, തെരഞ്ഞെടുപ്പ് കമ്മീഷൻ വൃത്തങ്ങൾ എസ്‌ഐആറുമായി ബന്ധപ്പെട്ട തീരുമാനങ്ങൾ രണ്ട് കമ്മീഷണർമാരുടെയും അംഗീകാരത്തോടെ ഏകകണ്ഠമായാണ് എടുത്തതെന്ന് വ്യക്തമാക്കിയിട്ടുണ്ട്.