സൈന്യത്തിനെതിരായ പ്രസ്താവന നടത്തിയതിന് രാജ്യദ്രോഹ കുറ്റം ചുമത്തിയ കേസില്‍ ജെഎന്‍യു മുന്‍ വിദ്യാര്‍ഥി നേതാവ് ഷെഹ്‌ല റാഷിദിന്റെ അറസ്റ്റ് കോടതി തടഞ്ഞു. കേസില്‍ വിശദമായ അന്വേഷണം വേണമെന്ന് കോടതി നിരീക്ഷിച്ചു. അഡിഷണല്‍ സെഷന്‍സ് ജഡ്ജ് പവന്‍ കുമാര്‍ ജെയിന്‍ ആണ് ഷെഹ്‌ലയുടെ അറസ്റ്റ് തടഞ്ഞ് ഇടക്കാല ഉത്തരവ് ഇറക്കിയത്.

അന്വേഷണവുമായി സഹകരിക്കണമെന്നും ഷെഹ്‌ലയോട് കോടതി ആവശ്യപ്പെട്ടു. ജമ്മു കശ്മീരിന്റെ പ്രത്യേക പദവി റദ്ദാക്കിയതിന് പിന്നാലെ സംസ്ഥാനത്ത് സൈന്യം മനുഷ്യാവകാശലംഘനം നടത്തുന്നുവെന്നും വീടുകള്‍ തകര്‍ക്കുന്നുവെന്നും ഷെഹ്‌ല ട്വീറ്റ് ചെയ്തിരുന്നു. ഇതേത്തുടര്‍ന്ന് സുപ്രീംകോടതി അഭിഭാഷകന്‍ അലോക് ശ്രീവാസ്തവ നല്‍കിയ പരാതിയില്‍ ഡല്‍ഹി സൈബര്‍ സെല്‍ ഷെഹ്‌ലക്കെതിരെ രാജ്യദ്രോഹ കുറ്റം ചുമത്തി കേസെടുക്കുകയായിരുന്നു.