ന്യൂദല്‍ഹി: വാഹനവിപണിയിലുണ്ടായിരിക്കുന്ന ഇടിവിനു  കാരണം ഓണ്‍ലൈന്‍ ടാക്സി സര്‍വീസുകളാണെന്ന ധനമന്ത്രി നിര്‍മല സീതാരാമന്റെ വാദത്തെ പരിഹസിച്ച് സോഷ്യല്‍ മീഡിയ. ട്വിറ്ററില്‍ ബോയ്‌കോട്ട് മില്ലേനിയല്‍സ് എന്ന പേരില്‍ ഹാഷ്ടാഗ് ക്യാപെയ്ന്‍  നടക്കുകയാണ്. രാജ്യത്തെ ചെറുപ്പക്കാർ യാത്രകൾക്കായി  ഒല, ഊബര്‍ ടാക്സികളിലേക്ക്  മാറിയതാണ് ടൂ വീലര്‍, ഫോര്‍ വീലര്‍ വാഹന വില്‍പ്പനയിൽ  ഇടിവുണ്ടായതെന്നായിരുന്നു മന്ത്രിയുടെ കണ്ടെത്തല്‍. ഇതിനെതിരെയാണ് ട്രോളുകൾ തുടങ്ങിയത്.

പുതുതലമുറയിലുള്ളവര്‍ ഓക്‌സിജന്‍ രാവിലെ കൂടുതല്‍ വലിക്കുന്നതിനാലാണ് ഓക്‌സിജന്‍ മാന്ദ്യത്തിന് കാരണമെന്നാണ് ഇതിന് മറുപടിയായി കുമാരി രത്‌ന എന്ന ട്വിറ്റര്‍ യൂസറുടെ ട്വീറ്റ്. ഇതിനൊപ്പം യോഗ ചെയ്യുന്ന ബാബാ രാംദേവിന്റെ ചിത്രവും കൊടുത്തിട്ടുണ്ട്. ജലമാന്ദ്യത്തിന് കാരണം വെള്ളം ഉപയോഗിക്കുന്നതാണെന്നും വ്യോമയാന മേഖലയിലെ പ്രതിസന്ധി    വീഡിയോ കോള്‍ വന്നതാണെന്നുമുള്ള ട്വീറ്റുകളുമുണ്ട്.