കിരീടമോഹവുമായി കളത്തിലെത്തിയ ലിവർപൂളിനെ എവർട്ടൺ തളച്ചു (0–-0).  ഇംഗ്ലീഷ്‌ പ്രീമിയർ ലീഗ്‌ ചാമ്പ്യൻമാരാകാൻ അഞ്ച്‌ പോയിന്റ്‌ അകലെയാണ്‌ ലിവർപൂൾ. ഇതിനിടയിൽ മാഞ്ചസ്റ്റർ സിറ്റി തോൽവി വഴങ്ങിയാൽ ചിത്രം മാറും. ലിവർപൂൾ കിരീടമുയർത്തും. എട്ടു കളികളാണ്‌ അവർക്ക്‌ ബാക്കിയുള്ളത്‌.
മറ്റൊരു മത്സരത്തിൽ ചെൽസി ആസ്റ്റൺ വില്ലയെ കീഴടക്കി (2–1). ഇന്ന്‌ ടോട്ടനം ഹോട്‌സ്‌പർ വെസ്റ്റ്‌ഹാം യുണൈറ്റഡിനെ നേരിടും.

എവർട്ടണെതിരെ ലിവർപൂളിന്‌ പ്രതീക്ഷകളെല്ലാം തെറ്റി. കളിയവസാനം ഡൊമിനിക്‌ കാൽവെർട്ട്‌ ലെവിന്റെ ഗോളെന്നുറച്ച ഷോട്ട്‌ തട്ടിയകറ്റിയ ഗോൾകീപ്പർ അലിസൺ ബെക്കറാണ്‌ ലിവർപൂളിനെ തോൽവിയിൽനിന്ന്‌ രക്ഷിച്ചത്‌. സാദിയോ മാനെയും മുഹമ്മദ്‌ സലായും ചേർന്ന മുന്നേറ്റനിരയുടെ മുനയൊടിച്ചു എവർട്ടൺ പ്രതിരോധം. പ്രത്യാക്രമണങ്ങളിൽ വിറപ്പിക്കുകയും ചെയ്‌തു.

നാളെ ക്രിസ്റ്റൽ പാലസുമായാണ്‌ ലിവർപൂളിന്റെ അടുത്തമത്സരം.