ഗുണ്ടാപ്പിരിവ് നൽകാത്തതിന്‌ ബിജെപി പ്രവർത്തകന്റെ ലോറി യുവമോർച്ച മേഖലാ പ്രസിഡന്റ് അടിച്ചു തകർത്തു. കരകുളം മുല്ലശേരി പതിയനാട് ലതാ ഭവനിൽ എസ് അനിൽകുട്ടന്റെ ടിപ്പർലോറിയാണ് തകർത്തത്. യുവമോർച്ച കരകുളം മേഖലാ പ്രസിഡന്റും ഗുണ്ടാനേതാവുമായ പാണൻ ലാലു എന്ന് വിളിക്കുന്ന വിനീഷ് എം നായർ ആണ് ആക്രമണം നടത്തിയത്.

ഞായറാഴ്ച രാത്രി ഒന്നരയോടെയാണ് സംഭവം. മുല്ലശേരിയിൽ ഒരു വീടിന്റെ നിർമാണത്തിന് സാധനങ്ങളും മണ്ണും എത്തിക്കാൻ ഓർഡർ കിട്ടിയതിന് പിന്നാലെ വിനീഷ് അനിൽ കുട്ടനോട് ഗുണ്ടാപിരിവ് ആവശ്യപ്പെട്ടു. നൽകാൻ കഴിയില്ലെന്ന് പറഞ്ഞതോടെ വണ്ടി ഓടാൻ അനുവദിക്കില്ലെന്ന് ഭീഷണിപ്പെടുത്തി. സജീവ ബി ജെ പി പ്രവർത്തകനാണ് അനിൽ. കൊലപാതക ശ്രമം, ഭവനഭേദനം, പിടിച്ചുപറി ഉൾപ്പെടെ നിരവധി ക്രിമിനൽ കേസുകളിൽ പ്രതിയാണ് വിനീഷ്. ലോറി തകർത്ത സംഭവത്തിൽ നെടുമങ്ങാട് പൊലീസ് കേസെടുത്തു.