കേരളത്തിലെ മുസ്‌ലിം ജനവിഭാഗത്തിന്റെ യഥാർഥ സംരക്ഷകർ സി.പി.ഐ.എമ്മാണെന്ന് മന്ത്രി എം.എം.മണി. മുസ്‌ലിങ്ങളുടെ ആകെ അവകാശം ലീഗിനല്ല എന്നും മന്ത്രി മാധ്യമങ്ങളോട് പറഞ്ഞു. തലശേരി-മാറാട് കലാപങ്ങളുടെ നാളുകളിൽ മുണ്ടുമടക്കിക്കുത്തി നിന്നത് സി.പി.ഐ.എമ്മാണ് എന്നോ‍ർക്കണം. മുസ്‌ലിം ലീഗിനെതിരായ വിമർശനം ഇനിയും തുടരുമെന്നും അദ്ദേഹം പറഞ്ഞു.

തലശേരി കലാപകാലത്ത് മുണ്ടും മടക്കി കുത്തി നിന്നത് എം.വി.രാ​ഘവനും ഇ.എം.എസും പിണറായി വിജയനുമാണ്. സി.എച്ച്.മു​ഹമ്മദ് കോയയടക്കം മുസ്ലീം ലീഗ് നേതാക്കളാരും അങ്ങോട്ട് പോയില്ല. മലപ്പുറം ജില്ല രൂപീകരിച്ചത് ഇഎംഎസാണ്. മലപ്പുറം ജില്ല രൂപീകരണത്തിന് ഇഎംഎസ് മുൻകൈയെടുത്തപ്പോൾ പാകിസ്ഥാനുണ്ടാക്കുന്നുവെന്നാണ് കോൺ​ഗ്രസ് പറഞ്ഞത്- അദ്ദേഹം പറഞ്ഞു.

ഇതോടൊപ്പം തന്നെ മുസ്‌ലിങ്ങളുടെ ആകെ അവകാശം ലീഗിന് ആരും നൽകിയിട്ടില്ലെന്ന് മന്ത്രി പറഞ്ഞു. മുസ്‌ലിങ്ങളെ സംരക്ഷിക്കാൻ ഡൽഹിക്ക് പോയ കുഞ്ഞാലിക്കുട്ടിക്ക് എന്ത് സംഭവിച്ചെന്നും അദ്ദേഹം ചോദിച്ചു.ശബരിമല കേസ് സുപ്രീംകോടതിയുടെ പരിഗണനയിലാണ്. ഈ വിഷയത്തിൽ ആർക്കും ഇടപെടാൻ സാധിക്കില്ല. തിരഞ്ഞെടുപ്പ് അടുക്കുമ്പോൾ ശബരിമലയിൽ നിയമനിർമാണം നടത്തുമെന്ന കോൺഗ്രസിന്റെ അവകാശവാദം വെറും ബഡായിയാണെന്നും മന്ത്രി മാധ്യമങ്ങളോട് പറഞ്ഞു.