സംസ്ഥാന പ്രതിപക്ഷ നേതാവ് രമേശ് ചെന്നിത്തലയുടെ ഐശ്വര്യ കേരള യാത്രയുടെ സമാപനത്തിലെ രാഹുൽ ഗാന്ധിയുടെ പ്രസംഗത്തിനെതിരേ വിമർശനവുമായി സി.പി.ഐ.എം. രാഹുൽഗാന്ധിയുടെ പ്രസംഗം ബി.ജെ.പിയുടെ റിക്രൂട്ട് ഏജന്റിന്റേത് പോലെയെന്നത് ഞെട്ടിക്കുന്നതാണെന്ന് സി.പി.ഐ.എം സംസ്ഥാന സെക്രട്ടേറിയറ്റ് ആരോപിച്ചു.

രാഹുൽ ബി.ജെ.പിയെ വിമർശിക്കാത്തത് കേന്ദ്ര നിർദേശപ്രകാരമാണ്. ഈ സമീപനമാണ് പല സംസ്ഥാനങ്ങളിലേയും കോൺഗ്രസ് എം.എൽ.എമാർക്കും ബി.ജെ.പിയിലേക്ക് പോകാൻ ഉത്തേജനം നൽകുന്നത്. കോൺഗ്രസിന്റെ അഖിലേന്ത്യാ നേതാവിന്റെ പ്രസംഗത്തിൽ ബി.ജെ.പിക്കെതിരെ ദുർബലമായ വിമർശനം ഉന്നയിക്കാൻ പോലും തയ്യാറായില്ല, എന്നു മാത്രമല്ല ഇടതുപക്ഷത്തിനെതിരെ കടന്നാക്രമിക്കുന്നതിൽ ബി.ജെ.പിയുടെ അതേ ശബ്ദം തന്നെയായിരുന്നു രാഹുൽ ഗാന്ധിക്കുമെന്നത് കോൺഗ്രസിന്റെ വർഗീയ വിധേയത്വത്തെ തുറന്നു കാട്ടുന്നതാണെന്നും സി.പി.ഐ.എം സംസ്ഥാന സെക്രട്ടേറിയറ്റ് പ്രസ്താവനയിൽ പറഞ്ഞു.