രണ്ടു തവണ തുടർച്ചയായി മത്സരിച്ചവർ മാറി നിൽക്കണം എന്ന് പറയാനുള്ള ആർജവം സി.പി.ഐ.എമ്മിനെയുള്ളൂ എന്നും അതൊരിക്കലും കോൺഗ്രസിന് കഴിയില്ലെന്നും സംസ്ഥാന ധനമന്ത്രി തോമസ് ഐസക്. ഇതോടൊപ്പം തന്നെ ഇത്തവണ നിയമസഭാ തെരഞ്ഞെടുപ്പില്‍ തനിക്കുപകരം ആലപ്പുഴയിൽ ജനവിധി തേടുന്ന പി.പി ചിത്തരഞ്ജനെ അഭിമാനത്തോടെ സ്വാഗതം ചെയ്യുന്നുവെന്നും ധനമന്ത്രി പറഞ്ഞു.

ആലപ്പുഴയിലുള്ള യുവനിര സഖാക്കളിൽ ഏറ്റവും ഊർജസ്വലനാണ് ചിത്തരഞ്ജനെന്ന് തോമസ് ഐസക് പറഞ്ഞു. തീരദേശത്തെ മത്സ്യത്തൊഴിലാളി മുന്നേറ്റത്തിന്റെ ചാലകശക്തിയാണ് ചിത്തരഞ്ജൻ. ഏതു പ്രശ്നത്തിലും ജനപക്ഷത്തു നിന്ന് ഇടപെടുന്ന സഖാവ് എന്ന നിലയിൽ എല്ലാവരുടെയും സ്നേഹാദരങ്ങൾക്ക് പാത്രമായ ചിത്തരഞ്ജനെ വിജയിപ്പിക്കണമെന്ന് അഭ്യർഥിക്കുന്നതായും അദ്ദേഹം പറഞ്ഞു.