രാഷ്‌ട്രീയ ജീവിതത്തിലെ ആദ്യ പോരാട്ടം ബംഗ്ലാദേശിൻ്റെ സ്വാതന്ത്ര്യത്തിന് വേണ്ടിയായിരുന്നുവെന്ന് പ്രധാനമന്ത്രി നരേന്ദ്ര മോദി. ബംഗ്ലാദേശിന്റെ സ്വാതന്ത്ര്യ സമരം എൻ്റെ രാഷ്ട്രീയ ജീവിതത്തിലും പ്രധാനപ്പെട്ടതാണെന്ന് നരേന്ദ്ര മോദി വ്യക്തമാക്കി. "ഞാനും എന്റെ സുഹൃത്തുക്കളും ബംഗ്ലാദേശിന്റെ സ്വാതന്ത്ര്യത്തിന് വേണ്ടി സത്യഗ്രഹം നടത്തി. ഈ സമയത്താണ് ഞാന്‍ ജയിലില്‍ കഴിയേണ്ടി വന്നത്. അന്ന് ഞങ്ങള്‍ക്ക് 20 വയസായിരുന്നു പ്രായം. എന്റെ ജീവിതത്തിലെയും നിര്‍ണായക സംഭവമായിരുന്നു ഇത്" - മോദി പറഞ്ഞു.

ഇന്ത്യയും ബംഗ്ലാദേശും ജനാധിപത്യത്തിന് വേണ്ടിയാണ് നിലകൊണ്ടത്. അതിനാൽ രണ്ട് രാജ്യങ്ങളും ഒരുമിച്ച് മുന്നേറേണ്ടതുണ്ടെന്നും പ്രധാനമന്ത്രി വ്യക്തമാക്കി. ബംഗ്ലാദേശ് സ്വാതന്ത്ര്യ സമരത്തില്‍ പങ്കെടുത്ത ഇന്ത്യന്‍ സൈനികരെയും അദ്ദേഹം അനുസ്‌മരിച്ചു. അതേസമയം, മോദിയുടെ സന്ദർശനത്തിനെതിരെ ബംഗ്ലാദേശിൽ പ്രതിഷേധം ശക്തമാണ്. ഇതുവരെ നാല് പേർ മരിച്ചതായും പത്തിലധികം പേർക്ക് പരിക്കേറ്റതായും റിപ്പോർട്ടുകളുണ്ട്.

തലസ്ഥാനമായ ധാക്കയിലും ചിറ്റഗോങ്ങിലുമാണ് പ്രതിഷേധം തുടരുന്നത്. കൊവിഡ് പ്രതിരോധങ്ങൾ തുടരുന്നതിനിടെ പ്രധാനമന്ത്രി നരേന്ദ്ര മോദിയുടെ ആദ്യ വിദേശ സന്ദർശനമാണിത്.