കോതമംഗലത്ത് കുടുംബങ്ങൾ തമ്മിലുള്ള വഴക്കിൽ ഡിവൈഎഫ്ഐ നേതാവിന് നേരെ ആസിഡ് ആക്രമണം. ശനിയാഴ്ച രാത്രി ചേലപ്പാട് മിനിപ്പടിയിൽ വച്ച് കാരകൊമ്പിൽ പയസ് എന്നയാളാണ് ആക്രമണം നടത്തിയത്. സാരമായ പൊള്ളലേറ്റ ഡിവൈഎഫ്ഐ ബ്ലോക്ക് പ്രസിഡൻറ് ജിയോ പയസ് കൊച്ചിയിലെ സ്വകാര്യ ആശുപത്രിയിൽ ചികിൽസയിലാണ്.

ആക്രമണത്തിന് ശേഷം സ്കൂട്ടറിൽ രക്ഷപെട്ട പ്രതിയെ ഒരു സംഘം ആക്രമിക്കുകയും വാഹനം കത്തിക്കുകയും ചെയ്തു. ജിയോ പയസ്, പിതാവ് അവിരാപാട്ട് പയസ്, ജിയോയുടെ സുഹൃത്ത് അൽത്താഫ് കബീർ എന്നിവർക്കാണ് പരുക്കേറ്റത്.

തലയ്ക്ക് സാരമായി പരുക്കേറ്റ കാരക്കൊമ്പിൽ പയസിനെ കോലഞ്ചേരിയിലെ ആശുപത്രിയിൽ പ്രവേശിപ്പിച്ചു. അവിരാപാട്ട് പയസിൻറെയും കാരകൊമ്പിൽ പയസിൻറെയും കുടുംബങ്ങൾ തമ്മിൽ വർഷങ്ങളായി നിലനിൽക്കുന്ന വഴക്കിൻറെ തുടർച്ചയാണ് കഴിഞ്ഞ ദിവസത്തെ സംഭവവികാസങ്ങൾ.