അനധികൃത സ്വത്ത് സമ്പാദന കേസിൽ മുസ്ലിം ലീഗ് നേതാവും അഴീക്കോട് എം.എൽ.എയുമായ കെ. എം ഷാജിയെ വിജിലൻസ് ചോദ്യംചെയ്യും. ഇതിനായി വിജിലൻസ് ഇന്ന് നോട്ടീസ് നൽകും. ഷാജിയുടെ കണ്ണൂരിലേയും കോഴിക്കോട്ടേയും ജില്ലകളിലെ വീടുകളിൽ നടത്തിയ റെയ്ഡ് സംബന്ധിച്ച റിപ്പോർട്ട് വിജിലൻസ് ഇന്ന് കോടതിയിൽ ഹാജരാക്കും. പരിശോധനയിൽ കണ്ണൂരിലെ വീട്ടില്‍ നിന്നാണ് 47 ലക്ഷം രൂപ കണ്ടെത്തിയത്.

ഈ പണത്തിന്‍റെ രേഖകള്‍ ഹാജരാക്കാന്‍ കെ. എം ഷാജി ഉദ്യോഗസ്ഥരോട് സമയം ചോദിച്ചിരുന്നു. പിടിച്ചെടുത്ത പണം സംബന്ധിച്ചാണ് കെ എം ഷാജിയെ പ്രധാനമായും ചോദ്യംചെയ്യുക. പണത്തിനൊപ്പം വിദേശ കറൻസിയും 50 പവൻ സ്വർണവും 72 രേഖകളും കൂടി പിടിച്ചെടുത്തിരുന്നു. പക്ഷെ വിദേശ കറന്‍സിയും സ്വര്‍ണവും വിജിലന്‍സ് പിന്നീട് തിരികെ നല്‍കി.