രാജ്യത്ത് കൊവിഡ് വ്യാപനം രൂക്ഷമാകുന്ന പശ്ചാത്തലത്തിൽ തലസ്ഥാന നഗരിയിൽ സമരം ചെയ്യുന്ന കർഷകരെ ഒഴിപ്പിച്ച് 'ഓപ്പറേഷൻ ക്ലീൻ' നടപ്പാക്കാൻ കേന്ദ്രസർക്കാർ. എന്നാൽ അംഗബലം വർധിപ്പിച്ച് 'ഓപ്പറേഷൻ ശക്തി'യിലൂടെ ഈ നീക്കത്തെ പ്രതിരോധിക്കുമെന്ന് സംയുക്ത കിസാൻ മോർച്ച അറിയിച്ചു.

ആദ്യകാലത്തെ തിരക്കില്ലെങ്കിലും ഡൽഹി അതിർത്തികളിലെ സമരഭൂമികളിൽ കൊവിഡ് സജീവമാണ്. കൊവിഡ് അതിവ്യാപനത്തിന്റെ ഭീഷണി ചൂണ്ടിക്കാട്ടി സമരഭൂമികൾ ഒഴിപ്പിച്ച് ഓപ്പറേഷൻ ക്ലീൻ നടപ്പാക്കാൻ കേന്ദ്രം നീക്കങ്ങൾ ആരംഭിച്ചതായി റിപ്പോർട്ടുണ്ട്. എന്നാൽ, സമരത്തിൽ നിന്നും പിന്മാറില്ലെന്നാണ് സമരക്കാർ. തങ്ങളുടെ ജീവനെ കുറിച്ചാണ് ആശങ്ക എങ്കിൽ കേന്ദ്രസർക്കാർ കാർഷിക നിയമങ്ങൾ പിൻവലിക്കട്ടെ എന്നാണ് കർഷകരുടെ നിലപാട്.

കേന്ദ്ര നീക്കത്തെ ഓപ്പറേഷൻ ശക്തിയിലൂടെ പ്രതിരോധിക്കാനാണ് സംയുക്ത കിസാൻ മോർച്ചയുടെ തീരുമാനം. ഇന്നുമുതൽ 26വരെ പ്രതിരോധ വാരം ആചരിക്കും. സർക്കാർ രോഗവ്യാപനം ഭീഷണി ചൂണ്ടിക്കാണിക്കുമ്പോൾ കുംഭമേളയിലും, തെരഞ്ഞെടുപ്പ് നടക്കുന്ന സംസ്ഥാനങ്ങളിലും കൊറോണ ഇല്ലേ എന്നാണ് കർഷകരുടെ മറുചോദ്യം.