രാജ്യത്ത് ഇന്ധന വില ഇന്നും കൂട്ടി. രാജ്യത്ത് പെട്രോളിന് 35 പൈസയും ഡീസലിന് 10 പൈസയുമാണ് ഇന്ന് വർധിപ്പിച്ചത്. തിരുവനന്തപുരത്ത് 102.55 രൂപയാണ് ഇന്ന് പെട്രോളിന് വില. ഡീസലിന് 96.22 രൂപയും നൽകണം. കൊച്ചിയിൽ പെട്രോളിന് 100.77 രൂപയാണ് വില. ഡീസലിന് 94.55 രൂപ. കോഴിക്കോട് പെട്രോളിന് 101.05 രൂപയും ഡീസലിന് 94.82 രൂപയുമാണ് വില.

അതേസമയം ഇന്ധനവില വർദ്ധനവിനെതിരെ കർഷക സംഘടനകളുടെ രാജ്യവ്യാപക പ്രതിഷേധം ഇന്ന് നടക്കും. സംയുക്ത കിസാൻ മോർച്ചയുടെ ആഹ്വാനപ്രകാരം, ഡീസൽ, പെട്രോൾ, പാചക വാതക വിലവർദ്ധനവിനെതിരെ ഇന്ന് രാവിലെ 10 മുതൽ ഉച്ചയ്ക്ക് 12 വരെ രാജ്യവ്യാപകമായി പ്രതിഷേധം സംഘടിപ്പിക്കും. അടിയന്തര പ്രാബല്യത്തിൽ ഇന്ധന വില പകുതിയായി കുറയ്ക്കണമെന്നാണ് സംയുക്ത കിസാൻ മോർച്ചയുടെ ആവശ്യം.

സ്‌കൂട്ടറുകൾ, മോട്ടോർ സൈക്കിളുകൾ, ട്രാക്ടറുകൾ, കാറുകൾ, ബസുകൾ, ട്രക്കുകൾ, കൂടാതെ ഒഴിഞ്ഞ ഗ്യാസ് സിലിണ്ടറുകൾ എന്നിവയുമായെത്തിയായിരിക്കും പ്രതിഷേധക്കാർ നിയുക്ത പൊതു സ്ഥലങ്ങളിൽ പ്രതിഷേധിക്കുക. അന്താരാഷ്ട്ര വിപണിയിൽ ക്രൂഡ് ഓയിലിന് മൂന്ന് വർഷത്തെ ഏറ്റവും ഉയർന്ന വിലയാണ്. അതുകൊണ്ട് തന്നെ വരും ദിവസങ്ങളിലും രാജ്യത്ത് ഇന്ധന വില കൂടുമെന്നാണ് കരുതപ്പെടുന്നത്.