രാജ്യത്തിനായി ഒളിമ്പിക്‌സ് മെഡൽ നേടിയ ഇന്ത്യൻ ഹോക്കി ടീം അംഗം മലയാളിയായ പി ആർ ശ്രീജേഷിണെ സംസ്ഥാന സർക്കാർ തഴഞ്ഞെന്ന പ്രചാരണം തള്ളി കായിക മന്ത്രി വി അബ്ദുറഹ്‌മാൻ. കായിക താരങ്ങൾക്ക് ഏറെ പ്രോത്സാഹനം നൽകുന്ന സംസ്ഥാനമാണ് കേരളം. ശ്രീജേഷിനുള്ള പാരിതോഷികവും മറ്റ് പ്രോത്സാഹനവും നാളെ മന്ത്രിസഭാ യോഗത്തിൽ തീരുമാനിക്കുമെന്നും കായിക മന്ത്രി പറഞ്ഞു.
സർക്കാരിന്റെ നയം ഇങ്ങനെയാണെന്നും. നടപടികൾ അനുസരിച്ച് മാത്രമേ സർക്കാർ എല്ലാ കാര്യങ്ങളും നടത്തുകയുള്ളൂവെന്നും കായിക മന്ത്രി വ്യക്തമാക്കി. ശ്രീജേഷ് മെഡൽ നേടിയതിന് ശേഷം മന്ത്രിസഭാ യോഗം നടന്നിട്ടില്ലെന്നും മന്ത്രിസഭാ യോഗമാണ് ഇത്തരം പ്രഖ്യാപനങ്ങളെല്ലാം നടത്തുന്നതെന്നും അദ്ദേഹം പറഞ്ഞു.
കായിക താരങ്ങൾക്ക് വേണ്ട വിധത്തിലുള്ള എല്ലാ പ്രോത്സാഹനവും ചെയ്യുന്നുണ്ട്. ഒളിമ്പിക്‌സിന് പോയ മലയാളി താരങ്ങൾക്കെല്ലാം മുൻകൂറായി സാധനങ്ങൾ വാങ്ങാൻ സംസ്ഥാന സർക്കാർ അഞ്ചു ലക്ഷം രൂപ വീതം നൽകിയിട്ടുണ്ട്. മറ്റ് സൗകര്യങ്ങളും നൽകിയിട്ടുണ്ടെന്ന് മന്ത്രി പറഞ്ഞു.
മറ്റു സംസ്ഥാനങ്ങളൊക്കെ നേരത്തെ എടുത്ത തീരുമാനങ്ങളായത് കൊണ്ടാണ് പ്രഖ്യാപനം നടത്തിയത്. പല കായിക താരങ്ങൾക്കും വീടും ജോലിയും നൽകിയിട്ടുണ്ട്. ഏറ്റവും കൂടുതൽ കായിക താരങ്ങൾക്ക് ജോലി നൽകിയ സർക്കാരാണിത്. അറുനൂറോളം കായിക താരങ്ങൾക്ക് ഇതിനോടകം ജോലി നൽകിയിട്ടുണ്ട്. ഇതെല്ലാം മന്ത്രിസഭാ യോഗത്തിൽ എടുക്കുന്ന തീരുമാനങ്ങളാണെന്നും വി.അബ്ദുറഹിമാൻ വ്യക്തമാക്കി.
