നിയമസഭാ തെരഞ്ഞെടുപ്പിൽ അരൂരിലെ സിറ്റിംഗ് എംഎൽഎ യായിരുന്ന ഷാനിമോൾ ഉസ്മാനെ പരാജയപ്പെടുത്താൻ അസൂത്രിത നീക്കം നടന്നതായി ഇല്ലിക്കൽ കുഞ്ഞുമോൻ. യുഡിഎഫ് സ്ഥാനാത്ഥിയായിരുന്നു ഷാനിമോൾ ഉസ്മാനെ പരാജയപ്പെടുത്താനായി മണ്ഡലത്തിൽ വൻതോതിൽ പണം ഇറക്കിയിരുന്നു. ഒടുവിൽ തെരഞ്ഞെടുപ്പ് തോൽവി രണ്ട് ബ്ലോക്ക് പ്രസിഡന്റുമാരുടെ തലയിൽവെച്ച് തടയൂരുകയായിരുന്നു എന്നും ഇല്ലിക്കൽ കുഞ്ഞുമോൻ പറഞ്ഞു.

ഇതിനായി ആലപ്പുഴയിലെ ഒരു റിസോർട്ടിൽ കോൺഗ്രസിന്റെ ഒരു ഉന്നത നേതാവും മുൻ ഡിസിസി പ്രസിഡന്റ് എം ലിജുവും രഹസ്യയോഗം ചേർന്നുവെന്ന് കുഞ്ഞുമോൻ ആരോപിച്ചു. അമ്പലപ്പുഴ നിയോജകമണ്ഡലം യുഡിഎഫ് സ്ഥാനാർത്ഥിയായിരുന്ന ഡിസിസി പ്രസിഡന്റ് എം ലിജുവിനെ തിരഞ്ഞെടുപ്പിൽ തോൽപ്പിക്കാൻ ശ്രമിച്ചെന്ന പരാതിയിൽ സസ്‌പെൻഡ് ചെയ്യപ്പെട്ടതിന് പിന്നാലെയാണ് വെളിപ്പെടുത്തൽ.

ആരോപണത്തിൽ ഇല്ലിക്കൽ കുഞ്ഞുമോൻ നൽകിയ വിശദീകരണം തൃപ്തികരമല്ലെന്ന് കാണിച്ചായിരുന്നു കഴിഞ്ഞദിവസം കെപിസിസി പ്രസിഡന്റ് കെ സുധാകരൻ സസ്‌പെൻഷൻ നടപടി പ്രഖ്യാപിച്ചത്.