ടോക്കിയോ പാരാലിമ്പിക്‌സ്: മെഡല്‍ ജേതാക്കളെ അഭിനന്ദിച്ച്‌ പിണറായി വിജയന്‍
അഡ്മിൻ
സംസ്ഥാന മുഖ്യമന്ത്രി പിണറായി വിജയന്‍ ടോക്കിയോ പാരാലിമ്പിക്‌സ് മെഡല്‍ ജേതാക്കളെ അഭിനന്ദിച്ചു.ഫേസ്ബുക്ക് കുറിപ്പിലൂടെയാണ് താരങ്ങളെ മുഖ്യമന്ത്രി അഭിനന്ദിച്ചത്. മെഡല്‍ ജേതാക്കളുടെ ചിത്രങ്ങളും അദ്ദേഹം തന്റെ ഫേസ്ബുക്കില്‍ പങ്കുവെച്ചു.
ടോക്കിയോ പാരാലിമ്പിക്‌സിന് തിരശ്ശീല വീഴുമ്പോള്‍ ചരിത്രത്തിലെ ഏറ്റവും മികച്ച പ്രകടനവുമായി ഇന്ത്യന്‍ താരങ്ങള്‍ രാജ്യത്തിന്റെ അഭിമാനമായി മാറിയെന്ന് മുഖ്യമന്ത്രി പറഞ്ഞു. അഞ്ച് സ്വര്‍ണമെഡലുകളുള്‍പ്പെടെ 19 മെഡലുകളാണ് അവര്‍ നേടിയത്. പരിമിതികള്‍ക്ക് മുന്നില്‍ കീഴടങ്ങാതെ, അതിശയകരമായ ഇച്ഛാശക്തിയും കഠിനാദ്ധ്വാനവും കൈമുതലാക്കി ലോകത്തിന്റെ നെറുകയില്‍ എത്തിയ എല്ലാ താരങ്ങളേയും ഹാര്‍ദ്ദവമായി അഭിനന്ദിക്കുന്നു.
പ്രതിസന്ധികള്‍ നിറഞ്ഞ കാലത്ത് അവര്‍ നാടിനാകെ പകരുന്ന ഊര്‍ജ്ജത്തിനു നന്ദി പറയുന്നു. കൂടുതല്‍ ഉയരത്തില്‍, കൂടുതല്‍ വേഗത്തില്‍, കൂടുതല്‍ കരുത്തോടെ എത്താന്‍ സാധിക്കട്ടെ എന്നാശംസിക്കുന്നു.ഈ നേട്ടങ്ങളില്‍ നിന്നും ആവേശമുള്‍ക്കൊണ്ട് നമ്മുടെ നാടിനും മുന്നോട്ടു കുതിക്കാനാകട്ടെയെന്നും പിണറായി ഫേസ്ബുക്കില്‍ കുറിച്ചു.
