ത്രിപുരയിൽ സിപിഎം ഓഫീസുകൾക്കുനേരെ ബിജെപിയുടെ വ്യാപക അക്രമം

ത്രിപുരയിൽ സിസിപിഎമ്മിറെ ഓഫീസുകൾക്കുനേരെ വ്യാപക അക്രമം അഴിച്ചുവിട്ട്‌ ബിജെപി പ്രവര്‍ത്തകര്‍. അഗർത്തലയിലെ പാര്‍ട്ടിയുടെ സംസ്ഥാന കമ്മിറ്റി ഓഫീസും, ദേശർ കഥ പത്രത്തിന്റെ ഓഫീസും ആക്രമിച്ചു. ഓഫീസുകൾക്ക്‌ മുന്നിൽ നിർത്തിയിട്ടിരുന്ന വാഹനങ്ങൾക്കും തീയിട്ടിട്ടുണ്ട്‌.

ധാരാളം സിപിഎം പ്രവർത്തകരുടെ വീടുകളും ബിജെപി പ്രവര്‍ത്തകര്‍ ആക്രമിച്ച്‌ തകർത്തു. ബിഡൽഗറിലുള്ള പാര്‍ട്ടിയുടെ ഓഫീസ്‌ പൊലീസ്‌ നോക്കിനിൽക്കെയാണ്‌ അക്രമികൾ തീവച്ചത്‌. കഴിഞ്ഞ ദിവസം ത്രിപുര മുൻ മുഖ്യമന്ത്രിയും സിപിഎം പൊളിറ്റ്‌ബ്യൂറോ അംഗവുമായ മണിക്‌ സർക്കാരിന്റെ വാഹനവ്യൂഹത്തിനുനേരെയും ബിജെപി ആക്രമണമുണ്ടായിരുന്നു.

അക്രമങ്ങളെ സിപിഎം അപലപിച്ചു. സംസ്ഥാനത്തെ പ്രതിപക്ഷത്തെ ഇല്ലാതാക്കാനുള്ള ശ്രമമാണ്‌ സർക്കാരും ബിജെപിയും നടത്തുന്നതെന്നും ആക്രമിച്ച്‌ തോൽപ്പിക്കാമെന്നും, നിശബ്‌ദരാക്കാമെന്നുമുള്ള സംഘ്‌പരിവാർ ലക്ഷ്യം നടക്കില്ലെന്നും സിപിഎം പ്രസ്‌താവനയിൽ പറഞ്ഞു.

08-Sep-2021