കോവിഡ് വ്യാപനത്തെ തുടര്‍ന്ന് സംസ്ഥാനത്ത് നിലനില്‍ക്കുന്ന പ്രത്യേക സ്ഥിതി വിശേഷം കണക്കിലെടുത്ത് കെട്ടിട നിര്‍മാണാനുമതിയുടെ കാലാവധി അവസാനിച്ച നിര്‍മ്മാണങ്ങള്‍ക്ക് 2022 മാര്‍ച്ച് 31 വരെ സമയപരിധി ദീര്‍ഘിപ്പിച്ച് നല്‍കിയതായി തദ്ദേശ സ്വയംഭരണ, എക്‌സൈസ് വകുപ്പ് മന്ത്രി എം വി ഗോവിന്ദന്‍ മാസ്റ്റര്‍ അറിയിച്ചു.

കേരള മുനിസിപ്പാലിറ്റി/പഞ്ചായത്ത് കെട്ടിട നിര്‍മാണ ചട്ടങ്ങളുടെ അടിസ്ഥാനത്തില്‍ അനുമതി നല്‍കിയിരുന്നതും 2020 മാര്‍ച്ച് 10ന് ശേഷം കാലാവധി അവസാനിച്ചതുമായ എല്ലാ നിര്‍മ്മാണ പെര്‍മിറ്റുകള്‍ക്കും 2021 സപ്തംബര്‍ 30വരെ കാലാവധി നീട്ടി നല്‍കിയിരുന്നു. തുടര്‍ന്ന് ഡിസംബര്‍ 2021 വരെ സമയപരിധി കൂട്ടിനല്‍കി. നിലവിലും കോവിഡ് വ്യാപനം പൂര്‍ണമായും നിയന്ത്രണ വിധേയമാകാത്തതും പൊതുജീവിതം സാധാരണ നിലയിലാകാത്തതും കണക്കിലെടുത്താണ് 2022 മാര്‍ച്ച് 31വരെ സമയപരിധി ദീര്‍ഘിപ്പിച്ച് നല്‍കുന്നതെന്ന് മന്ത്രി വ്യക്തമാക്കി.