വാവ സുരേഷിന് സി.പി.ഐ.എം വീട് നിർമിച്ച് നൽകുമെന്ന് മന്ത്രി വി.എൻ. വാസവൻ. അഭയം ചാരിറ്റബിൾ ട്രസ്റ്റുമായി സഹകരിച്ച് വീട് നിർമിച്ച് നൽകുമെന്നാണ് മന്ത്രി അറിയിച്ചത്. പാമ്പുകടിയേറ്റ് ഗുരതരാവസ്ഥയിൽ കോട്ടയം മെഡിക്കൽ കോളേജിൽ ചികിത്സയിൽ കഴിഞ്ഞിരുന്ന വാവ സുരേഷിനെ അൽപസമയം മുമ്പ് ഡിസ്ചാർജ് ചെയ്തിരുന്നു.

ഇതിന് പിന്നാലെയാണ് മന്ത്രിയുടെ പ്രതികരണം. കോട്ടയം മെഡിക്കൽ കോളേജിലെ ഡോക്ടർമാരുടെ അവസരോചിതമായ ഇടപെടലാണ് സുരേഷിനെ ജീവിതത്തിലേക്ക് തിരിച്ച് കൊണ്ടുവന്നതെന്നും മന്ത്രി പറഞ്ഞു. ആരോഗ്യനില പൂർണ തൃപ്തികരമായതിനെ തുടർന്നാണ് ഡിസ്ചാർജ് ചെയ്തത്. കൃത്യ സമയത്ത് കിട്ടിയ പരിചരണം തനിക്ക് രണ്ടാം ജന്മം സാധ്യമാക്കിയെന്ന് വാവ സുരേഷ് പ്രതികരിച്ചിരുന്നു.