രാജ്യത്ത് കേന്ദ്ര സർവീസിൽ 8.75 ലക്ഷം ഒഴിവുകൾ നികത്താതെ കേന്ദ്ര സർക്കാർ. ഇന്ത്യൻ റെയിൽവേയിൽ മാത്രം 3.03 ലക്ഷം ഒഴിവുകളാണ് നികത്താനുള്ളത്. കേന്ദ്രസർവീസിലാകെ 8,75,158 ഒഴിവുകളാണ് കേന്ദ്ര സർക്കാർ നികത്താത്തത്. ഗ്രൂപ്പ് എ തസ്തികയിൽ 21,255 ഒഴിവുകളും ഗ്രൂപ്പ് സി തസ്തികയിൽ 7,56,146 ഒഴിവുകളുമാണുള്ളതെന്ന് രാജ്യസഭയിൽ വി ശിവദാസൻ എംപി യുടെ ചോദ്യത്തിന് മറുപടിയിലാണ്
കേന്ദ്ര പഴ്സണൽ, പബ്ലിക് ഗ്രീവിയൻസ്, പെൻഷൻ സഹമന്ത്രി ജിതേന്ദ്ര സിങ് പറഞ്ഞത്.

ഗ്രൂപ്പ് ബി വിഭാഗത്തിൽ 97,757 ഒഴിവുകളുണ്ടെന്നും പാർലമെന്റിൽ മന്ത്രി പറഞ്ഞു. 2020 മാർച്ച് ഒന്നുവരെയുള്ള കണക്കാണിത്. ഗസറ്റഡ് തസ്തികകളിൽ 2292, നോൺ ഗസറ്റഡ് തസ്തികകളിൽ 3,01,190 എന്ന നിലയിലാണ് ഒഴിവുകൾ. കേരളം ഉൾപ്പെടുന്ന സതേൺ സോണിൽ ഗസറ്റഡ് തസ്തികകളിൽ 161 ഒഴിവും നോൺ ഗസറ്റഡ് തസ്തികകളിൽ 19,500 ഒഴിവുമുണ്ട്. വെസ്റ്റേൺ സോൺ കഴിഞ്ഞാൽ സതേൺ സോണിലാണ് ഏറ്റവും കൂടുതൽ ഒഴിവുള്ളത്.

റെയിൽവേ റിക്രൂട്ട്മെന്റ് ബോർഡുകളും റിക്രൂട്ട്മെന്റ് സെല്ലും വഴി നിയമിക്കപ്പെടുന്നവരുടെ എണ്ണത്തിൽ വലിയ കുറവാണ് കഴിഞ്ഞ വർഷങ്ങളിൽ രാജ്യത്ത് ഉണ്ടായത്. 2020-21 വർഷത്തിൽ ഇതുവഴി ആകെ നിയമിക്കപ്പെട്ടത് 5450 പേരാണ്. രാജ്യത്ത് കഴിഞ്ഞ അഞ്ചുവർഷത്തിനിടയിൽ ഏറ്റവും കുറവ് നിയമനം നടന്നത് 2020-21 വർഷത്തിലാണ്. കോവിഡ് വ്യാപനം ഉൾപ്പെടെയുള്ള പ്രതിസന്ധികളിൽ രാജ്യം നട്ടം തിരിയുമ്പോൾ തൊഴിൽ നൽകാതെ രാജ്യത്തെ യുവജനങ്ങളെ വെല്ലുവിളിക്കുകയാണ് ബിജെപി യുടെ നേതൃത്വത്തിലുള്ള കേന്ദ്ര സർക്കാർ ചെയ്യുന്നത്.