ചെറിയ നേതാക്കള്‍ ചെറിയ കള്ളവും വലിയ നേതാക്കള്‍ വമ്പന്‍ കള്ളവും പറയുന്ന നുണയന്മാരുടെ പാര്‍ട്ടിയാണ് ബിജെപിയെന്ന് സമാജ്‌വാദി പാര്‍ട്ടി പ്രസിഡന്റ് അഖിലേഷ് യാദവ്. ശനിയാഴ്ച ഉത്തര്‍പ്രദേശ് ബദായൂനിലെ തെരഞ്ഞെടുപ്പ് പ്രചാരണ റാലിക്കിടെയാണ് അഖിലേഷിന്റെ വിമര്‍ശനം.

സംസ്ഥാന തെരഞ്ഞെടുപ്പിന്റെ ആദ്യ ഘട്ടത്തിലെ വന്‍ പോളിങ് ബിജെപിക്കെതിരെയുള്ള മാറ്റത്തിന്റെ സൂചനയാണെന്നും അദ്ദേഹം പറഞ്ഞു. രണ്ടാം ഘട്ടത്തില്‍ ബിജെപി തുടച്ചുനീക്കപ്പെടുമെന്നും ബദായൂനില്‍ അവര്‍ക്ക് അക്കൗണ്ട് തുറക്കാനാകില്ലെന്നും അവര്‍ക്ക് കനത്ത വെല്ലുവിളി ഉയര്‍ത്തുന്ന അഖിലേഷ് അവകാശപ്പെട്ടു. ഫെബ്രുവരി 14നാണ് രണ്ടാംഘട്ട തെരഞ്ഞെടുപ്പ് നടക്കുന്നത്.

സഹാറന്‍പൂര്‍, ബിജ്‌നോര്‍, അമ്‌റോഹ, സാംഭല്‍, മൊറാദാബാദ്, രാംപൂര്‍, ബറേലി, ബുദൗന്‍, ഷാജഹാന്‍പൂര്‍ എന്നീ ജില്ലകളിലായി 55 നിയമസഭാ മണ്ഡലങ്ങളിലാണ് രണ്ടാം ഘട്ടത്തില്‍ വോട്ടിങ് നടക്കുന്നത്.