അക്രമം കൊണ്ട് പാർട്ടിയെ വളർത്താമെന്ന് ബിജെപി ധരിക്കരുതെന്ന് സിപിഎം സംസ്ഥാന സെക്രട്ടറി കോടിയേരി ബാലകൃഷ്ണൻ. സിപിഎമ്മിന്റെ സംയമനം ആർഎസ്എസ് ദൗർബല്യമായി കരുതരുതെന്നും കോടിയേരി പറഞ്ഞു.ഹരിദാസന്റെ കൊലപാതകത്തിൽ പ്രതിഷേധിച്ച് പുന്നോലിൽ സംഘടിപ്പിച്ച ബഹുജന കൂട്ടായ്മ ഉദ്‌ഘാടനം ചെയ്തുകൊണ്ട് സംസാരിക്കുകയായിരുന്നു അദ്ദേഹം.

സിപിഎം ഒന്നും ചെയ്യാൻ കഴിയാത്ത പാർട്ടിയെന്ന് തെറ്റിദ്ധരിക്കരുത്. സംയമനം പാലിക്കേണ്ടപ്പോൾ സംയമനം പാലിക്കും. ചെറുത്തു നിൽക്കേണ്ട ഘട്ടം വരുമ്പോൾ ചെറുത്തുനിൽക്കും, സ്വന്തം അച്ഛനെയും സഹോദരനേയും കൊല്ലാൻ മടിയില്ലാത്തവരാണ് ആർഎസ്എസുകാരെന്നും അദ്ദേഹംപറഞ്ഞു .

കൊലയാളി സംഘങ്ങളെ സൃഷ്ടിക്കുന്നവരാണ് ആർ എസ് എസ്. കുട്ടികളെ ബാലഗോകുലത്തിൽ എത്തിച്ച് ചെറുപ്പം മുതൽ പരിശീലനം നൽകുന്നു. രക്ഷിതാക്കൾ തെറ്റിദ്ധരിച്ച് കുട്ടികളെ ബാലഗോകുലത്തിൽ അയക്കുന്നു. രാഷ്ടീയ അക്രമം ഇല്ലാതെ വരുമ്പോൾ ക്വട്ടേഷൻ സംഘങ്ങളായി ഇത് മാറുന്നുവെന്നും അദ്ദേഹം പറഞ്ഞു.