കേരളത്തിൽ നടക്കുന്ന കെ റെയിൽ വിരുദ്ധ സമരങ്ങൾക്ക് പിന്നിൽ തീവ്രവാദ സംഘടനകളെന്ന് മന്ത്രി സജി ചെറിയാൻ ആരോപിച്ചു. പണം ഇറക്കി ജനങ്ങളെ തെറ്റിധരിപ്പിച്ച് സർക്കാരിന് എതിരെ തിരിക്കാനാണ് ഈ ശക്തികളുടെ ശ്രമമെന്നും മന്ത്രി പറഞ്ഞു.

കെ റെയിലിനായി ഇട്ട കല്ല് ഊരിയാൽ വിവരമറിയും, അക്കാര്യത്തിൽ ഒരു സംശയവുമില്ലെന്നും മന്ത്രി കൂട്ടിച്ചേർത്തു.കെ റെയിൽ വിരുദ്ധ സമരത്തിലൂടെ തിരിച്ചു വരാമെന്ന കോൺഗ്രസ് മോഹം നടക്കില്ലെന്ന് സജി ചെറിയാൻ പറഞ്ഞു. ദേശീയ പാതാ വികസനത്തിൽ വാക്കുപാലിച്ച എൽഡിഎഫ് സർക്കാർ കെ റെയിലിലും പറഞ്ഞ വാക്ക് പാലിക്കുമെന്ന് മന്ത്രി പറഞ്ഞു. പദ്ധതിയുടെ ഭാഗമായി ഒന്നാന്തരം നഷ്ടപരിഹാര പാക്കേജ് ഉണ്ട്. എല്ലാം വ്യക്തമായി സർക്കാർ പറയുന്നുണ്ട്.

കോൺഗ്രസും ബിജെപിയും തീവ്രവാദ സംഘടനകളും ആണ് സമരം നടത്തുന്നത്. സിൽവർ ലൈൻ പദ്ധതി കേരളത്തിന്റെ ഭാവിക്കുവേണ്ടിയാണ്. ഇന്ത്യയിൽ 11 സംസ്ഥാനങ്ങളിൽ സിൽവർ ലൈനിനു സമാനമായ പദ്ധതികൾ തുടങ്ങി. കോൺഗ്രസ്, ബിജെപി ഭരിക്കുന്ന സംസ്ഥാനങ്ങളിലും സമാന പദ്ധതികൾ തുടങ്ങിയിട്ടുണ്ടെന്നും അദ്ദേഹം പറഞ്ഞു.