പാലക്കാട് നഗരസഭാ ഭരണത്തിൻ്റെ കെടുകാര്യസ്ഥതയ്ക്കെതിരെ ആർഎസ്എസിന് പിന്നാലെ ബിഎംഎസും. വലിയങ്ങാടി പച്ചക്കറി മാർക്കറ്റിൽ മാലിന്യ നീക്കം നിലച്ചതിനെ തുടർന്നാണ് നഗരസഭയ്‌ക്കെതിരെ പ്രതിഷേധവുമായി സംഘടനകൾ മുന്നോട്ട് വന്നത്. ദിവസങ്ങൾക്ക് ശേഷം വാഹനത്തെയും അധികൃതരെയും തടഞ്ഞായിരുന്നു ബിഎംഎസ് ചുമട്ടുതൊഴിലാളികളുടെ പ്രതിഷേധം. ആരോഗ്യ സ്ഥിരംസമിതി നിർജീവമായതോടെയാണ് മാലിന്യ നീക്കത്തിൽ നടപടി വൈകുന്നതെന്നാണ് ബിജെപി കൗൺസിലർമാർക്കിടയിലെ സംസാരം.

നഗരത്തിലെ റോഡുകളുടെ ശോചനീയാവസ്ഥയിൽ പ്രതിഷേധിച്ച് നേരത്തെ ആർഎസ്എസ് രംഗത്ത് വന്നിരുന്നു. അതിനു പിന്നാലെയാണ് മാലിന്യം നീക്കുന്നതിനെ സംബന്ധിച്ച വിഷയത്തിൽ ബിഎംഎസ് പ്രതിഷേധിച്ചത്. ആർഎസ്എസ് പ്രവർത്തകർ തന്നെ റോഡിലെ കുഴിയടച്ചുകൊണ്ട് പ്രചരിപ്പിച്ച ഒരു ഫേസ്ബുക് പോസ്റ്റ് മുൻപ് വൈറലായിരുന്നു.