അടുത്ത സാമ്പത്തിക വർഷത്തെ സംസ്ഥാന പദ്ധതിക്ക്‌ ആസൂത്രണ ബോർഡിന്റെ അംഗീകാരം. കേന്ദ്ര സർക്കാരിന്റെ പകവീട്ടലിന്റെ ഭാഗമായുള്ള സാമ്പത്തിക പ്രയാസത്തിനിടയിലും വളർച്ചയാണ്‌ ലക്ഷ്യം. ജീവനോപാധി വർധിപ്പിക്കാനുള്ള പരിപാടികൾക്കും മുൻഗണന നൽകി. യോഗത്തിൽ മുഖ്യമന്ത്രി പിണറായി വിജയൻ അധ്യക്ഷനായി. പദ്ധതി അടങ്കൽ നിലനിർത്താനാണ്‌ തീരുമാനം. 39,640 കോടി രൂപയാണ്‌ മൊത്തം വാർഷിക പദ്ധതി അടങ്കൽ. സംസ്ഥാന പദ്ധതി അടങ്കൽ 22,322 കോടിയും.

സുസ്ഥിര വികസനം, സാമൂഹിക ഉൾച്ചേർക്കൽ, ഉന്നത വിദ്യാഭ്യാസം, ശാസ്‌ത്ര സാങ്കേതിക വിദ്യാ വികസനം, വരുമാന വളർച്ച എന്നിവയിലായിരിക്കും പദ്ധതിയുടെ പ്രതിബദ്ധത. സംസ്ഥാനത്തിന്റെ ആസൂത്രണ പ്രക്രിയയുടെ പുരോഗതി നിരീക്ഷിക്കാനുള്ള ഓൺലൈൻ സംവിധാനമായ പ്ലാൻസ്‌പേസ് 2.0 മുഖ്യമന്ത്രി ഉദ്ഘാടനംചെയ്‌തു. പ്ലാൻസ്‌പേസിന്റെ പുതിയ പതിപ്പാണിതെന്ന്‌ ആസൂത്രണ ബോർഡ്‌ ഉപാധ്യക്ഷൻ ഡോ. വി കെ രാമചന്ദ്രൻ യോഗത്തിൽ പറഞ്ഞു.