രാജസ്ഥാൻ മുഖ്യമന്ത്രിയും മുതിർന്ന നേതാവുമായ അശോക് ഗെഹ്ലോട്ടിനെതിരെ രൂക്ഷ വിമർശനവുമായി സച്ചിൻ പൈലറ്റ്. അശോക് ഗെഹ്ലോട്ടിന്റെ നേതാവ് സോണിയ ഗാന്ധിയല്ലെന്നും വസുന്ധര രാജെയാണെന്നും സച്ചിൻ പരിഹസിച്ചു.

വസുന്ധര രാജെ മുഖ്യമന്ത്രിയായിരുന്ന സമയത്തെ അഴിമതികൾ എന്തുകൊണ്ടാണ് അന്വേഷിക്കാതിരുന്നതെന്ന് സച്ചിൻ ചോദിച്ചു. സംസ്ഥാനത്ത് നേതൃമാറ്റം ആവശ്യമാണ്. തനിക്കെതിരെ വ്യാജ കത്ത് പ്രചരിപ്പിക്കുകയാണ്. ബിജെപി സർക്കാരിനെതിരെയുള്ള അഴിമതി ആരോപണം അന്വേഷിക്കണമെന്ന് സച്ചിൻ ആവശ്യപ്പെട്ടു.

നിലവിൽ സംസ്ഥാനത്ത് സ്വന്തം നിലയിൽ ജൻ സംഘർഷ് യാത്ര പ്രഖ്യാപിച്ചിരിക്കുകയാണ് സച്ചിൻ. മെയ് 11 മുതൽ അഞ്ച് ദിവസം നീണ്ടു നിൽക്കുന്നതാണ് യാത്ര. അജ്മീറിൽ നിന്നും ആരംഭിച്ച് ജയ്പുരിലായിരിക്കും യാത്ര അവസാനിക്കുക. ബിജെപി സർക്കാരിന്റെ കാലത്ത് നടന്ന അഴിമതികൾ അന്വേഷിക്കാൻ ഗെഹ്ലോട്ട് തയ്യാറാകുന്നില്ലെന്നാണ് സച്ചിൻ ഉയർത്തുന്ന ആരോപണം.

അതേസമയം കോൺഗ്രസ് എംഎൽഎമാരുടെ കലാപത്തെ അതിജീവിച്ചതായി ഗെഹ്ലോട്ട് കഴിഞ്ഞ ദിവസം പറഞ്ഞിരുന്നു. തന്നെ താഴെയിറക്കാൻ അമിത് ഷായിൽ നിന്നും വാങ്ങിയ പണം തിരികെ നൽകാൻ ഹെഹ്ലോട്ട് പറഞ്ഞു. വസുന്ധര രാജെ എംഎൽഎമാരുടെ വിമത നീക്കത്തെ പിന്തുണയ്ക്കാൻ തയ്യാറായില്ലെന്നും ഹെഹ്ലോട്ട് പറഞ്ഞു. ഇതിനു പിന്നാലെയാണ് സച്ചിൻ പ്രതികരണവുമായി രംഗത്തെത്തിയത്.