മഹാരാഷ്ട്രയിലെ മഹാ വികാസ് അഘാടി സർക്കാരിനോട് വിശ്വാസ വോട്ട് തേടാൻ നിർദ്ദേശിച്ച ഗവർണറുടെ നടപടിയെ വിമർശിച്ച് സുപ്രീംകോടതി. ഗവർണറുടെ നടപടി ഭരണഘടനപരമായി തെറ്റായിരുന്നുവെന്ന് സുപ്രീം കോടതി ബെഞ്ച് വിധിച്ചു.

നിയമസഭയിൽ വിശ്വാസവോട്ട് തേടാത്തതിനാൽ സർക്കാർ പുനഃസ്ഥാപിക്കണമെന്ന ഉദ്ധവ് താക്കറെയുടെ ആവശ്യം സുപ്രീം കോടതി അംഗീകരിച്ചില്ല. വിശ്വാസവോട്ടിന് നിൽക്കാതെയാണ് ഉദ്ധവ് താക്കറെ രാജിവെച്ചത് എന്നതിനാൽ സർക്കാരിനെ പുനഃസ്ഥാപിക്കുന്നതിന് ഉത്തരവിടുന്നില്ലെന്ന് ഭരണഘടനാ ബെഞ്ച് വ്യക്തമാക്കി. പാർട്ടിയിലെ തർക്കങ്ങൾ പരിഹരിക്കാനുള്ള മാധ്യമമായി വിശ്വാസവോട്ടെടുപ്പിനെ ഉപയോഗിക്കാനാകില്ല.

ഭരണഘടനയിൽ ഇല്ലാത്ത അധികാരം വിനിയോഗിക്കാൻ ഗവർണർക്ക് കഴിയില്ലെന്നും സുപ്രീം കോടതി പറഞ്ഞു. വിശ്വാസവോട്ടിന് നിർദ്ദേശം നൽകാനുള്ള ഒരു വസ്തുതകളും ഗവർണറുടെ പക്കൽ ഉണ്ടായിരുന്നില്ല. സർക്കാരിന് ഭൂരിപക്ഷം ഇല്ലെന്ന് പ്രതിപക്ഷ നേതാവ് പോലും പറഞ്ഞിരുന്നില്ല. പാർട്ടിയ്ക്കുളഅളിലെ പ്രശ്‌നങ്ങൾ പരിഹരിക്കേണ്ടത് വിശ്വാസ വോട്ടെടുപ്പിലൂടെയല്ലെന്നും ചീഫ് ജസ്റ്റിസ് ഡി.വൈ ചന്ദ്രചൂഢ് വിമർശിച്ചു.

സ്പീക്കറുടെ അധികാരങ്ങൾ സംബന്ധിച്ച നിർദ്ദേശങ്ങളുള്ള നബാംറബിയ വിധി വിശാല ബെഞ്ച് പുനപ്പരിശോധിക്കണമെന്നും കോടതി പറഞ്ഞു. ഏക്നാഥ് ഷിൻഡെ വിഭാഗത്തിലെ ഗോഗവാലെയെ വിപ്പായി നിയമിച്ച സ്പീക്കറുടെ നടപടിയും തെറ്റാണ്. രാഷ്ട്രീയ പാർട്ടിയാണ് വിപ്പിനെ നിയമിക്കേണ്ടതെന്നും സുപ്രീം കോടതി ചൂണ്ടിക്കാട്ടി. ഷിൻഡെ ഉൾപ്പടെ 16 എംഎൽഎമാരുടെ അയോഗ്യത സംബന്ധിച്ച വിഷയത്തിൽ തീരുമാനം എടുക്കേണ്ടത് സ്പീക്കർ ആണെന്ന് സുപ്രീം കോടതി വ്യക്തമാക്കി.

ചീഫ് ജസ്റ്റിസ് ഡി.വൈ ചന്ദ്രചൂഢിനെ കൂടാതെ ജസ്റ്റിസുമാരായ എം.ആർ ഷാ, കൃഷ്ണ മുരാരി, ഹിമ കോലി, പിഎസ് നരസിംഗ എന്നിവർ അടങ്ങിയ ബെഞ്ചാണ് കേസിൽ വിധി പറഞ്ഞത്. ഇരുപക്ഷത്തും നിന്നുള്ളവർ നൽകിയ ഒരു കൂട്ടം ഹർജികളാണ് ഭരണഘടനാ ബെഞ്ച് പരിഗണിച്ചത്.