കഴക്കൂട്ടം കിൻഫ്ര ഫിലിം & വിഡിയോ പാർക്കിലെ സ്റ്റാൻഡേർഡ് ഡിസൈൻ ഫാക്ടറിയുടെ നിർമാണോദ്ഘാടനം വ്യവസായ വകുപ്പ് മന്ത്രി പി.രാജീവ് നിർവഹിച്ചു. 2 ലക്ഷം ചതുരശ്ര അടി വിസ്തീർണത്തിൽ 8 നിലകളിലായിട്ടാണ് സ്റ്റാൻഡേർഡ് ഡിസൈൻ ഫാക്ടറിയ്ക്കായി പുതിയ കെട്ടിടം ഒരുങ്ങുന്നത്.

കേരളത്തിന്റെ വ്യവസായ മുന്നേറ്റത്തിൽ ഏറ്റവും വലിയ പങ്ക് വഹിക്കാൻ കിൻഫ്ര ഫിലിം & വിഡിയോ പാർക്കിലെ സ്റ്റാൻഡേർഡ് ഡിസൈൻ ഫാക്ടറിക്ക് കഴിയുമെന്ന് മന്ത്രി പറഞ്ഞു. 5,000 പേർക്ക് പ്രത്യക്ഷമായും 7,500 പേർക്ക് പരോക്ഷമായും തൊഴിൽ ലഭിക്കുമെന്ന് പ്രതീക്ഷിക്കുന്ന സ്റ്റാന്റേർഡ് ഡിസൈൻ ഫാക്ടറി 2 വർഷത്തിനുള്ളിൽ പൂർത്തിയാക്കുമെന്നും മന്ത്രി കൂട്ടിച്ചേർത്തു.

100 കോടിയോളം രൂപയുടെ നിക്ഷേപം സ്റ്റാൻഡേർഡ് ഡിസൈൻ ഫാക്ടറിയിൽ നിന്നും പ്രതീക്ഷിക്കുന്നുണ്ട്.കടകംപള്ളി സുരേന്ദ്രൻ എം.എൽ.എ അധ്യക്ഷനായിരുന്നു. ചീഫ് സെക്രട്ടറിയും കിൻഫ്ര ചെയർമാനുമായ വി.പി ജോയ് മുഖ്യപ്രഭാഷണം നടത്തി.

മന്ത്രി പി രാജീവിന്റെ ഫേസ്ബുക്ക് പോസ്റ്റ്:

പതിനായിരത്തിലധികം തൊഴിലും നൂറ് കോടിയോളം രൂപയുടെ നിക്ഷേപവും പ്രതീക്ഷിച്ചുകൊണ്ട് കിൻഫ്ര ഫിലിം ആന്റ് വീഡിയോ പാർക്കിൽ പുതിയ സ്റ്റാന്റേർഡ് ഡിസൈൻ ഫാക്ടറി കെട്ടിടത്തിന്റെ നിർമ്മാണം ആരംഭിച്ചിരിക്കുന്നു. രണ്ട് ലക്ഷം ചതുരശ്ര അടിയിൽ നിർമ്മിക്കുന്ന കെട്ടിടം ഐ.ടി/ഐ.ടി അനുബന്ധ വ്യവസായങ്ങൾ ആകർഷിക്കും. തലസ്ഥാന നഗരിയിലെ ഐ.ടി വ്യവസായമേഖലയിൽ കൂടുതൽ കുതിപ്പ് നൽകുന്ന ഈ കെട്ടിടത്തിന്റെ നിർമ്മാണം സമയബന്ധിതമായി 2025ൽ തന്നെ പൂർത്തീകരിക്കും.