കേരളത്തിലെ വിദ്യാഭ്യാസ രംഗം മികവിന്റെ പാതയില്‍: മന്ത്രി പി. രാജീവ്
അഡ്മിൻ
കേരളത്തിലെ അങ്കണവാടി മുതല്‍ ഉന്നത വിദ്യാഭ്യാസ സ്ഥാപനങ്ങള്‍ വരെ മികവിന്റെ പാതയിലാണെന്ന് മന്ത്രി പി. രാജീവ്. തൃക്കാക്കര നഗരസഭയില്‍ എട്ടാം വാര്‍ഡില്‍ നിര്‍മിച്ച 73-ാം നമ്പര്‍ അങ്കണവാടി ഉദ്ഘാടനം ചെയ്യുകയായിരുന്നു മന്ത്രി.
നാക് ഉള്‍പ്പെടെയുള്ളവയുടെ പട്ടികയില്‍ മികച്ച റാങ്ക് നേടാന്‍ കേരളത്തിലെ വിദ്യാഭ്യാസ സ്ഥാപനങ്ങള്‍ക്ക് സാധിച്ചിട്ടുണ്ട്. അങ്കണവാടികള്‍ എല്ലാം സ്മാര്‍ട്ടാവുകയാണ്. വളരെ പരിമിതമായ സ്ഥലത്ത് 2300 സ്‌ക്വയര്‍ഫീറ്റില്‍ മൂന്ന് നിലകളിലായിട്ടാണ് അങ്കണവാടി കെട്ടിടം പണിപൂര്‍ത്തീകരിച്ചിരിക്കുന്നത്.
കുട്ടികളുടെ അഭിരുചികള്‍ മനസിലാക്കി അവരുടെ വളര്‍ച്ചക്ക് സഹായകരമായ രീതിയില്‍ പുതിയ കെട്ടിടം മാറണമെന്നും മന്ത്രി പറഞ്ഞു. അങ്കണവാടി പരിസരത്ത് നടന്ന പരിപാടിയില്‍ ഉമ തോമസ് എം.എല്‍.എ അധ്യക്ഷത വഹിച്ചു.
തൃക്കാക്കര നഗരസഭ ചെയര്‍പേഴ്‌സണ്‍ അജിത തങ്കപ്പന്‍, വൈസ് ചെയര്‍മാന്‍ എ.എ ഇബ്രാഹിംകുട്ടി, വികസന കാര്യ സ്റ്റാന്‍ഡിങ് കമ്മറ്റി ചെയര്‍പേഴ്‌സണ്‍ സ്മിത സണ്ണി, കൗണ്‍സിലര്‍മാരായ അനിത ജയചന്ദ്രന്‍, അബ്ദു ഷാന, തൃക്കാക്കര നഗരസഭ സെക്രട്ടറി (ഇന്‍ ചാര്‍ജ് ) ടി.കെ ഹരിദാസന്‍, ജനപ്രതിനിധികള്‍, അങ്കണവാടി ജീവനക്കാര്‍, രക്ഷിതാക്കള്‍ തുടങ്ങിയവര്‍ പങ്കെടുത്തു.
