പുതുപ്പള്ളിയിൽ ഒരു പുണ്യാളനേ ഉള്ളൂ, അത്​ ഗീവർഗീസ്​ പുണ്യാളനാണെന്ന്​ എൽഡിഎഫ് നിയുക്ത സ്ഥാനാർത്ഥി ജെയ്ക്​ സി തോമസ്​. ഗീവർഗീസ് സഹദാ അല്ലാതെ മറ്റ് ഏതെങ്കിലും ഒരു പുണ്യാളൻ ഉണ്ടോ എന്ന് ജനം മറുപടി പറയട്ടെ. കോൺഗ്രസുകാർക്കും ബിജെപിക്കാർക്കും വിശ്വാസികൾക്കും അവിശ്വാസികൾക്കുമെല്ലാം അങ്ങനെത്തന്നെയാണെന്നും ജെയ്ക് പറഞ്ഞു.

പുതുപ്പള്ളിയിലേത്​​ വ്യക്തികൾ തമ്മിലുള്ള മല്ലയുദ്ധമല്ല.​ വ്യക്തിപരമായ പരാമർശങ്ങൾക്കോ വിവാദങ്ങൾക്കോ പ്രസക്​തിയില്ല. സവിശേഷകരമായി ഉയർത്തിപ്പിടിക്കുന്ന ആശയധാരകളാണ്​ ഏറ്റുമുട്ടുന്നത്​. അതിൽ ഹിതകരമായത്​ ജനങ്ങൾ തെരഞ്ഞെടുക്കും. പുതുപ്പള്ളിയിൽ വികസനവും വികസന മുരടിപ്പും​ ചർച്ചയാകും. ഇടതുപക്ഷത്തിന്​ ശക്തമായ അടിത്തറയുള്ള മണ്ഡലമാണ്​ പുതുപ്പള്ളി​.​ ഇടതുമുന്നണിക്ക്​ അനുകൂലമായ സാഹചര്യവുമുണ്ട്​. വൈകാരികത ​കൊണ്ട്​ തെരഞ്ഞെടുപ്പിനെ നേരിടാനാണ്​ യുഡിഎഫ്​ ശ്രമമെന്നും ജെയ്ക്​ പറഞ്ഞു.

കഴിഞ്ഞതവണ ഉമ്മൻചാണ്ടിയോടുള്ള വൈകാരികത മൂലം ഭൂരിപക്ഷം 50,000 കടക്കും എന്നായിരുന്നു പ്രചരണം. ഉമ്മൻ‌ചാണ്ടി നേമത്തേക്ക് പോകുന്നു എന്ന തരത്തിൽ വാർത്ത നൽകിയശേഷം വൈകാരികത സൃഷ്ടിക്കാൻ കഴിഞ്ഞ തെരഞ്ഞെടുപ്പിലും യുഡിഎഫ് ശ്രമിച്ചു. ഫലം വന്നപ്പോൾ ഒന്നുമായില്ല. പുതുപ്പള്ളിയിൽ വിജയിക്കാൻ കൃത്യമായ പദ്ധതികൾ ഇടതുപക്ഷത്തിനുണ്ട്. ഏതൊക്കെ വാർഡുകളിൽ എങ്ങനെ പ്രവർത്തിക്കണം എന്നത് അടക്കം പ്രവർത്തന പദ്ധതി തയാറാണെന്നും ജെയ്ക് പറഞ്ഞു.