യാക്കോബായ സഭാ നേതൃത്വത്തെ സന്ദർശിച്ച് പുതുപ്പള്ളിയിലെ എൽഡിഎഫ് സ്ഥാനാർത്ഥി ജെയ്ക്ക് സി. തോമസ്. മന്ത്രി വി എൻ വാസവനും ഒപ്പമുണ്ടായിരുന്നു. പല കാര്യങ്ങളിലും സർക്കാർ സഭയ്ക്കൊപ്പം നിന്നിട്ടുണ്ടെന്നും സഭയെ സഹായിച്ചവരെ തിരിച്ചും സഹായിക്കുമെന്നും യാക്കോബായ സഭ നേതൃത്വം വ്യക്തമാക്കി.

മതമേലധക്ഷന്മാരെയും സാമൂഹിക നേതാക്കളെയും സന്ദർശിക്കുന്നതിന്റെ ഭാഗമായാണ് മന്ത്രി വി എൻ വാസവനും ജെയ്ക്ക് സി തോമസും യാക്കോബായ സഭ നേതൃത്വത്തെ കണ്ടത്. പുതുപ്പള്ളിയിൽ യാക്കോബായ സഭയ്ക്ക് നിർണായക സ്വാധീനമുണ്ട്.

യാക്കോബായ കൊച്ചി ഭദ്രാസന ആസ്ഥാനം സന്ദർശിച്ച ഇരുവരും മെത്രാപ്പൊലീത്ത ട്രസ്റ്റി ജോസഫ് മാർ ഗ്രിഗോറിയസുമായി കൂടിക്കാഴ്ച്ച നടത്തി. സഭയ്ക്ക് നീതി ഉറപ്പാക്കുന്നതിൽ സർക്കാർ മികച്ച പരിഗണന നൽകുന്നുണ്ടെന്നു ജോസഫ് മാർ ഗ്രിഗോറിയസ് പറഞ്ഞു.