സവാളയുടെ കയറ്റുമതി തീരുവ ചുമത്തി കേന്ദ്രം. 40 ശതമാനമാണ് സവാള കയറ്റുമതിക്ക് തീരുവ ഏര്‍പ്പെടുത്തിയത്. സവാള വില കുത്തനെ ഉയര്‍ന്ന പശ്ചാത്തലത്തിലാണ് നടപടിയെന്ന് കേന്ദ്ര സര്‍ക്കാരിന്റെ വാദം. 2023 ഡിസംബര്‍ 31 വരെയാണ് കയറ്റുമതി തീരുവ ചുമത്തിയിരിക്കുന്നത്. സെപ്റ്റംബറില്‍ സവാള വില ഉയരാന്‍ സാധ്യതയുണ്ടെന്ന റിപ്പോര്‍ട്ടുകളുണ്ടായിരുന്നു.

അതിന്റെ അടിസ്ഥാനത്തിലാണ് വില വര്‍ധനവ് ഏര്‍പ്പെടുത്തിയിരിക്കുന്നത്. കയറ്റുമതി തീരുവ വര്‍ധിപ്പിക്കുന്നതിലൂടെ സവാളയുടെ ആഭ്യന്തര ലഭ്യത മെച്ചപ്പെടുത്താന്‍ സഹായിക്കുമെന്ന് ധനകാര്യമന്ത്രാലയം പ്രസ്താവനയിലൂടെ അറിയിച്ചു.

സവാളയുടെ ശരാശരി വില ശനിയാഴ്ച 30.72 രൂപയായിരുന്നു. ഒരു കിലോ സവാളയ്ക്ക് പരമാവധി ഏര്‍പ്പെടുത്താവുന്ന വില 63 രൂപയാണ്. കുറഞ്ഞത് 10 രൂപയും. പൊതുതാല്‍പ്പര്യം മുന്‍നിര്‍ത്തിയാണ് നടപടിയെന്ന് സിബിഐസി അറിയിച്ചു. ഗോതമ്പിന്റെയും അരിയുടെയും കയറ്റുമതിക്കും സര്‍ക്കാര്‍ നിയന്ത്രണങ്ങള്‍ ഏര്‍പ്പെടുത്തിയിട്ടുണ്ട്.