കോൺ​ഗ്രസ് ടാസ്ക് ഫോഴ്സ് അം​ഗവും തിരഞ്ഞെടുപ്പ് തന്ത്രജ്ഞനുമായ സുനിൽ കനു​ഗോലുവിനെ വിമർശിച്ച് എ എ റഹീം എംപി. ഒരു പി ആർ ഏജൻസി വിദ​ഗ്ധനും വെളളം കോരിയാൽ വളരുന്ന മരമല്ല കേരളത്തിലെ കോൺ​ഗ്രസ്. സുനിൽ കനു​ഗോലു വന്നതുകൊണ്ടോ പ്രവർത്തിച്ചത് കൊണ്ടോ കേരളത്തിലെ കോൺ​ഗ്രസ് വളരില്ലെന്നും എ എ റഹീം വിമർശിച്ചു.

നമ്മുടെ രാഷ്ട്രീയം മാറുന്നു. മാധ്യമ പ്രവർത്തനം മാറുന്നു. അത് ഇല്ലാകഥകൾ മെനയുന്നിടത്തേക്ക് എത്തുന്നു. മാധ്യമ പ്രവർത്തകർ മാത്രമല്ല. കോൺ​ഗ്രസിന്റെ ഉന്നതാധികാര സമിതിയിലേക്ക് തിരഞ്ഞെടുപ്പ് വിദ​ഗ്ധൻ എന്ന പേരിൽ ഒരു പി ആർ‌ വിദ​ഗ്ധനെ കൊണ്ടുവരുന്നു. ഒരു പി ആർ ഏജൻസി വിദ​ഗ്ധനും വെളളം കോരിയാൽ വളരുന്ന മരമല്ല കേരളത്തിലെ കോൺ​ഗ്രസ് എന്ന് റിപ്പോർട്ടർ ടിവി ഡിബേറ്റ് വിത്ത് നികേഷ് കുമാർ പരിപാടിയിൽ റഹിം പറഞ്ഞു.

മരത്തിന് വെളളം കോരിയാൽ ചെലപ്പൊ മരം വളരും. ഇത് ഇലക്ട്രിക് പോസ്റ്റാണ്. അതുകൊണ്ട് സുനിൽ കനു​ഗോലു എത്ര ബക്കറ്റ് വെളളം കോരി ഇവിടെ ഒഴിച്ചാലും സുനിൽ‌ കനുഗോലുവിന്റെ കൈയ്യും ഊർ‌ജ്ജവും പോകുമെന്നതല്ലാതെ കേരളത്തിലെ കോൺ​ഗ്രസിന് ​വളർ‌ച്ചയുണ്ടാകില്ലെന്നും എ എ റഹീം പരിഹസിച്ചു.

സുനിൽ കനു​ഗോലു ഇവിടെ ഓപ്പറേഷൻ ആരംഭിച്ചതിന് ശേഷമാണല്ലോ, തമ്മിലുളള അടി പുറത്തുകാണിക്കാതിരിക്കാനുളള മാന്യതയെങ്കിലും നിങ്ങൾ കാണിക്കണമെന്ന് എ കെ ആന്റണി പറഞ്ഞതെന്നും എ എ റഹീം പറഞ്ഞു.