കേന്ദ്ര ആഭ്യന്തര മന്ത്രി അമിത് ഷായെ വിമർശിച്ച് ശിവസേന (യുബിടി) എംപി സഞ്ജയ് റാവത്ത്. അമിത് ഷാ സ്വന്തം പാർട്ടി പ്രവർത്തനങ്ങളിൽ ശ്രദ്ധ കേന്ദ്രീകരിക്കണമെന്നും തിരഞ്ഞെടുപ്പ് നടക്കുന്ന അഞ്ച് സംസ്ഥാനങ്ങളിലും ബിജെപി പരാജയപ്പെടുമെന്നും അദ്ദേഹം പറഞ്ഞു.

"ഇന്ത്യ സഖ്യത്തെക്കുറിച്ച് അമിത് ഷാ ആശങ്കപ്പെടേണ്ടതില്ല. അഞ്ച് സംസ്ഥാനങ്ങളിലെ തെരഞ്ഞെടുപ്പിലാണ് അദ്ദേഹം ശ്രദ്ധ കേന്ദ്രീകരിക്കേണ്ടത്. അഞ്ച് സംസ്ഥാനങ്ങളിലും ബിജെപി പരാജയപ്പെടാൻ പോകുന്നു. ഇന്ത്യൻ സഖ്യത്തിന്റെ നേതാക്കൾ കഴിവുള്ളവരാണ്," സഞ്ജയ് റാവത്ത് പറഞ്ഞു.

സംസ്ഥാന നിയമസഭാ തെരഞ്ഞെടുപ്പിന് ശേഷം ഇൻഡ്യ സഖ്യത്തിന്റെ യോഗങ്ങള്‍ വീണ്ടും നടക്കുമെന്നും രാജസ്ഥാൻ, ഛത്തീസ്ഗഡ്, മധ്യപ്രദേശ് തുടങ്ങിയ സംസ്ഥാനങ്ങളില്‍ കോണ്‍ഗ്രസാണ് ഒന്നാം നമ്ബര്‍ പാര്‍ട്ടിയെന്നും അദ്ദേഹം പറഞ്ഞു.

നേരത്തെ കേന്ദ്ര ആഭ്യന്തര മന്ത്രി അമിത് ഷാ ബിഹാറിലെ മുസാഫര്‍പൂര്‍ ജില്ലയില്‍ നടന്ന പൊതുയോഗത്തില്‍ പ്രതിപക്ഷ സഖ്യമായ ഇൻഡ്യയെ വിമര്‍ശിച്ചിരുന്നു. പ്രധാനമന്ത്രി നരേന്ദ്ര മോദിയെ എതിര്‍ക്കുക എന്നതാണ് അവരുടെ ഏക അജണ്ടയെന്ന് അമിത് ഷാ പറഞ്ഞിരുന്നു.