കുസാറ്റ് ക്യാംപസിലുണ്ടായ ദുരന്തത്തിൽ മരിച്ച വിദ്യാർഥി സാറ തോമസിന് മുഖ്യമന്ത്രി പിണറായി വിജയനും മന്ത്രിമാരും അന്തിമോപചാരം അർപ്പിച്ചു. സാറയുടെ സംസ്കാരം നാളെയാണ്. സാറയുടെ മൃതദേഹം പൊതുദർശനത്തിനായി താമരശേരി കോരങ്ങാട് അൽഫോൻസാ സ്കൂളിലെത്തിച്ചപ്പോഴാണ് മുഖ്യമന്ത്രിയും മന്ത്രിമാരും അവിടെയെത്തിയത്.

നവകേരള സദസ്സുമായ ബന്ധപ്പെട്ട് കോഴിക്കോട് ജില്ലയിലുള്ള മുഖ്യമന്ത്രിയും മന്ത്രിമാരും കൊടുവള്ളിയിലേക്കുള്ള യാത്രാമധ്യേയാണ് താമരശേരിയിൽ എത്തിയത്. നാളെയാണ് സാറയുടെ സംസ്കര ചടങ്ങുകള്‍ നിശ്ചയിച്ചിട്ടുള്ളത്. അപകടത്തില്‍ മരിച്ച മറ്റൊരു വിദ്യാർഥിയായ അതുൽ തമ്പിയുടെ സംസ്കാര ചടങ്ങുകള്‍ പൂര്‍ത്തിയായി. കുസാറ്റിൽ സ്കൂൾ ഓഫ് എൻജിനീയറിങ് വിദ്യാർഥിയായ അതുല്‍ കൂത്താട്ടുകുളം കിഴകൊമ്പ് കൊച്ചുപാറയിൽ കെ.എം.തമ്പിയുടെ മകനാണ്. കൂത്താട്ടുകുളം വടകര സെന്റ് ജോൺസ് ഓർത്തഡോക്സ് പള്ളിയിലായിരുന്നു സംസ്കാര ശുശ്രൂഷകള്‍.