ടി പി ചന്ദ്രശേഖരന്‍ വധക്കേസിലെ പ്രതികൾക്ക് ശിക്ഷാ ഇളവ് നൽകില്ലെന്ന് വ്യക്തമാക്കി ജയിൽ ഡിജിപി. കേസിൽ കോടതി ഉത്തരവിന് മുമ്പാണ് ലിസ്റ്റ് തയ്യാറാക്കിയതെന്നും വിഷയത്തിൽ കണ്ണൂർ ജയിൽ സൂപ്രണ്ടിനോട് വിശദീകരണം ചോദിക്കുമെന്നും ജയിൽ ഡിജിപി ബൽറാം കുമാർ ഉപാധ്യായ പറഞ്ഞു.

അതേസമയം പ്രതികളുടെ പേര് ലിസ്റ്റിൽ നിന്ന് ഒഴിവാക്കുമെന്നും ഡിജിപി പറഞ്ഞു. കഴിഞ്ഞ വർഷം തയ്യാറാക്കിയ ലിസ്റ്റാണ് പുറത്ത് വന്നതെന്നും ഡിജിപി പറഞ്ഞു. ആസാദി കാ അമൃത് മഹോത്സവത്തിന്റെ ഭാഗമായി ഉണ്ടാക്കിയതാണിത്.

ഈ ലിസ്റ്റ് ഇപ്പോൾ നൽകിയത് എന്തിനാണെന്ന് ജയിൽ സുപ്രണ്ടിനോട് അന്വേഷിക്കുമെന്നും ഡിജിപി വ്യക്തമാക്കി. ലിസ്റ്റ് പുറത്തിറക്കിയതിന് ശേഷം 2024 ജനുവരിയിലാണ് കീഴ്‌ക്കോടതി ഉത്തരവ് ശരിവച്ച് ഹൈകോടതി ഉത്തരവ് വരുന്നതെന്നും ഡിജിപി കൂട്ടിച്ചേർത്തു.